uMthunywa
Nkosilathi Sibanda
ISIHLALO sikamongameli weZimbabwe Football Association siyatshisa!
UBenjani Mwaruwari kuzamele alinde okweminyaka emithathu andubana agcwalise isifiso sakhe sokufuna ukuba ngumongameli weZifa.
Kulesiqephu sesisekelo sombuso weZifa esichaza ukuba lo lalo ofuna ukuthi avotelwe ukuba ngumongameli walinhlanganiso kumele abeleminyaka yokuzalwa ephezulu kwe-40. UMwaruwari ule-37.
Kulandela ukukhuluma kwakhe ukuthi usengena kumncintiswano wokuvotelwa, isikhulumi seZifa, uXolisani Gwesela ukhumbuze labo abafuna ukuphatheka kukhetho ukuthi kumele babe leminyaka ecaciswe kusisekelo sombuso.
Ukhetho lwenkokheli zeZifa luzaqhutshwa mhlaka 5 kuMpalakazi njalo kuvota amakhansila aphuma kungatsha zenguqu ezingaphansi kweZifa.
UMwaruwari kubikwa uzethule emphakathini esanda kuvela kwele-Europe ngoLwesibili lapho akhulume ukuthi ufuna ukuncintisa esihlalweni esatshiywa nguCuthbert Dube.
Ukuvezwa kwesiqephu seZifa sekudale ukukhonona okukhulu kulabo abasekela uMwaruwari.
UMthunywa ukhulume lezazi zenguqu lamagqwetha ababike ukuthi uMwaruwari kuzamele “akhale” okuzwayo ukuze kutshintshwe isisekelo sombuso ngoba sekusele amalanga amalutshwane ukuthi kungenwe kukhetho.
UGwesela ukhulume kabanzi ngakho konke okufunekayo ekumsakazo weStarFm ngoLwesibili.
Kubikwa inengi lalabo abakade bephosela amaphepha kulolukhetho belisazi ngomthetho lo ochaza ngeminyaka yokuzalwa. UMwaruwari kukhanya ungene engazi lutho.
Ekuqaleni, njengokubikwa kwamaphephandaba, uMwaruwari ubefuna ukuncintisa kusihlalo sobumongameli, kodwa ngoLwesithathu, uMthunywa uncwetshwe indlebe kuthiwa uzancintisa kwesikamsekeli.
Kusikhundla sikamsekeli uMwaruwari uzamelana loOmega Sibanda. USibanda ugijima loPhilip Chiyangwa okhangelelwe ukuthi akhokhele kukhetho njengoba elosekelo lwamakhansila amanengi kuzabelo.
Okungabe kunikeza uMwaruwari intshukuntshu yokuncintisa kukhetho yikudlala kwakhe okwamasizini amanengi eseEurope, ukuba ngukaputeni wamaWarriors kanye lokuncedisa kwakhe inguqu yabasakhulayo kuleli.
