uMthunywa
Uthando luyinto enhle ngoba phela lebhayibhili liyaveza ukuthi uthando luyisipho esikhulu kulazo zonke. Akula lutho ongalwenza kuyikuthi awulathando. Omama bethu bengelathando ababelalo besikhulisa angiboni ukuthi babengasenzela izinto ezitshiyeneyo kugoqela ezenyanyisayo ezifana lokusintshintsha izitshubo lokusifinya amakhovula.
Kungasithando angiboni ukuthi babengenelisa ukulala bekhangele sigula kumbe siloba imisebenzi yangekhaya esasiyiphiwe ngamatitshala ethu esikolo.
Kuyafana lejaha eselizimisele ukuthatha,nxa kuyikuthi intombi leyo eliyithandayo selifuna ukuyithatha liyazama imizamo yonke ukuthi liyevela kwabozala.
Kungangcono nxa kuyikuthi imali yakhe ayihlangani aboleke kuyise inkomo kumbe lemali yokuyavela. Ngoba phela nxa kulomuntu osumthandile uyazama ngamandla akho onke ukuthi ufeze isithembiso oyabe ususenzile.
Angiboni futhi ukuthi asebefunda baqeqetsha bazebaba ngodokotela labo “proffessor” babengenelisa ukuthi bafunde bafike lapho abakhona bengakuthandi lokhu ababekufundela esikolo.
Engikutshoyo yikuthi nxa ulutho uluthanda kulula ukuthi ubekezele uze uthole leyo mpendulo oyabe uyikhangelele.
Sengixoxisane lomama wakoLunga uPromise phose okwezinyanga ezimbili, ngimxwayisa ukuthi engenza njani ukuthi athole incwadi yokufa komnawakhe uPrimrose oseleminyaka emihlanu wabhubha.
UPrimrose wayelomtwana okuthiwa nguSally, owamthathela incwadi yokuzalwa ngesibongo sakhe. UPrimrose wayethandana lobaba wakoNcube okweminyaka eyisitshiyagalolunye andubana adlulele enkosini.
Njengoba uPrimrose wayefele endlini kaNcube, uNcube wakhulumisana lobaba kaPrimrose ngamalungiselelo omngcwabo bahamba bonke bayathatha i-burial order.
Abantu abasebenza koMsitheli bathi bebuza ukuthi uPrimrose wayethethwe uyise wathi ye, bahle babhala ku “burial order” ukuthi uPrimrose wayeyendile.
Aqhubeka-ke amalungiselelo omngcwabo, wangcwatshwa uPrimrose.
AbakoPrimrose bahamba bayathatha umntwana kaPrimrose ngoba uNcube wayesafuna ukuthi athole amaphepha emthethwandaba ukuthi abenguye umzali kaSally, njengoba wayemthembise uPrimrose ukuthi uzasala enakekela uSally.
Kwadlula iminyaka embili abakoPrimrose sebebona uNcube engasavakatshi engasalobi lencwadi bathi kungangcono bayemkhangela endlini yakhe bathola sekuhlala umnewabo uJoe owahle wabaphatha luklubhu wabaxotsha njengezinja.
Babuyela ngemva kwamaviki ambalwa sebesiyathatha izinto zikaPrimrose bekhulumisana labakoNcube ukuthi babancedise ukuthi bathathe incwadi yokufa kukaPrimrose ukwenzela ukuthi umntanakhe uSally enelise ukuqhubekela phambili ngemfundo yakhe.
UJoe waqala esala ukuthi abancedise esithi uyesaba ukuzondwa yimuli yangakibo ngoba wayebona ingani i-death certificate kaPrimrose ingaphuma uSally uzahamba emthethwandaba eyezama ukulwela ilifa lakhe ayelitshiyelwe nguNcube.
UJoe ayekhala ngakho yikuthi incwadi yokufa kukaNcube yayilotshwe ukuthi uNcube wayengathathanga, njalo yena wayengasazwisisi ukuthi abakoPrimrose babesithi uPrimrose wayetshade lobani.
UPromise uthi wayangeka esesizwa uJoe esesithi uyise nguye owathi uNcube loPrimrose babetshadile, bona babekwazi behlalisene.
Ngoba phela lamhla esiyavela wahamba lomakhelwane wakhe kazange abize abangakibo.
Esikuthabelayo yikuthi uPromise ubekezele ngoba emthanda umtaka dadewabo, balutshwana abanjengaye, abathanda abantwana babafowabo ngaloluhlobo.
Lamhla uyathokoza ukuthi lanxa bekunzima ubekezele walandela zonke izixwayiso zeTrinity Project kanye lamalunga ehofisi kaHulumende enika ama-death certificate, useyitholile i-death certificate yomnawakhe.
Sebezaba lokuhlaliseka emoyeni lomdeni wakhe (closure) ngoba lindaba ibe ibathwalise nzima ibatshila umimoya.
USally laye owayesekhala ngokuthi lwamenza uthando lukanina lejaha lakhe uNcube, ujabule kakhulu ngoba sesenelisa ukuthi athole imali zikanina eze-pension ukwenzela ukuthi aqhubekele phambili ngemfundo yakho.
Asihlanganeni ngeviki elizayo.
Umlobi uthinteka kukheli ethi [email protected]
Laku nombolo ezithi 0773 195 055/
09 881508
