uMthunywa
YiNtatheli kaMthunywa
NGESIZINI edluleyo iHighlanders yagunyulwa kumqhudelwano wenkezo yeChibuku ngesiphangiphangi, kodwa lonyaka umqeqetshi wayo uErol Akbay ubike ukuthi ukuthatha inkezo ngokwakhe ngakho iTshilamoya izafinyelela kuma-final enkezo le nxa abadlali betshibilika ngendlela ayifunayo.
UAkbay ubike lokhu ngesikhathi ekhuluma lentatheli yephephandaba likazulu ebuzwa ngamalungiselelo akhe okulwela inkezo yeChibuku, elemali engange$500 000. Umqeqetshi lo uzakhangelela ukunqoba linkezo ibe ngeyesibili enkambeni yeBosso lokhe yena waphiwa lumsebenzi. Abadlali beMutare balande ukuzomelana leTshilamoya kulumdlalo ovula umqhudelwano wenkezo yeChibuku, bethembele ukuthi badlule begijima ngoba yiyo yodwa inkezo eseleyo kuleliqembu eselivalelisa inkundla yeCastle Lager.
IHighlanders yathwala inkezo yayo yakuqala eyeZNA Charities ngoNtulikazi lapho eyanqoba iHarare City ngembekwa 4-2 eBarbourfields njalo.
Lokho angeke kuyethuse iMutare City loba izangena koBulawayo ngeSonto ithole inkundla yeBarbourfields ilokhe isathunqa ngemva kokunqoba kweHighlanders phezulu kweDynamos kumidlalo yeligi yeCastle. Umdlalo waseBarbourfields lo ungabe ukhanya ulula kuHighlanders kulandela ukukholisa kwayo ukudla iDeMbare, kodwa yona Mutare City ayisiqembu lokudelela.
Amaqembu la adibana okwesithathu kulumnyaka. Okwakuqala, umdlalo weligi waphela ungutshiki lobhanqa 0-0, kuhlandla lesibili iBosso yanqotshwa 2-1 egumeni layo. Ngesizini ka2014, mhla kusungulwa inkezo le, iHighlanders yakhitshwa yiHarare City kuma-semi finals ngokunqotshwa 3-0.
Imbali le isemuva kwengqondo zikaAkbay.
“Okwenzakalayo angilani lakho, sekwedlula. Engingakho khathesi ngomdlalo wethu leMutare City kunkezo yeChibuku. Imidlalo yeligi yehlukene leyenkezo. Kwandise ukuthi amathimu atshintshe umdlalo nxa esedibana kowenkezo ngaso sonke isikhathi. IHighlanders ihlose ukuthi inqobe kuyo yonke imidlalo eseleyo, ebalisa lalowo oweMutare City.
“Lonyaka sizatshova, sisebenze nzima ukuze sitshengisele ukuqina lokuzimisela kweHighlanders kuyo yonke imincintiswano. Ngizagcizelela ngithi umdlalo wangeSonto utshiyene njalo siwulungiselela sikhangelele ukunqoba,” nguAkbay lo ekhuluma ngesikhathi iqembu leBosso lijabula labalandeli balo eHighlanders Club house, ngemva kokunqoba iDynamos 2-1.
“IHighlanders kumele inqobe. Ngithanda ukukhuthaza abasekeli bethu ukuthi babuye ngobunengi baqhubekele phambili ngokuphatha kuhle abakwenzayo.”
Imidlalo yakuqala yenkezo iqhutshwa kulimpelaviki. Mhlaka 30 Mpandula kuzadlalwa ama-quarter final andubana kudibanwe kuma-semi final ngempelaviki yamhlaka 21 kusiya ku-23 Mfumfu. Ilanga lokudinga intshantshu ngumhlaka 5 kuLwezi.
Kusenjalo, ezinye eziphuma emhlubulweni ongezansi yelizwe lazo ziyancintisa kulinkezo yeChibuku.
NgoLwesihlanu emini iBorder Strikers inxuswe zintshantshu zenkezo ka2015, iHarare City enkundleni yeRufaro.
Abafana beBeitbridge bakhangelelwe ukuthi baqhubeke ngokudanisa amaqembu amakhulu ngokunqoba. IHarare City liqembu elifuna ukugcina iChibuku ingeyayo okwamampela.
IHarare City yaba zintshantshu zeChibuku ngesizini ka2015 ngemva kokunqoba iDynamos 2-1.
Iziqholo zeZhwane ziyavakatshela iCaps United eNational Sports Stadium, kuthi iChicken Inn iyethekelela iTriangle.
Imidlalo yeChibuku ngokupheleleyo:
NgoLwesihlanu: Harare City v Border Strikers (Rufaro).
NgoMgqibelo: FC Platinum v Chapungu (Mandava), Caps United v Tsholotsho (National Sports Stadium), ZPC Kariba v Bulawayo City (Nyamhunga).
NgeSonto: Highlanders v Mutare City (Barbourfields), Dynamos v How Mine (Rufaro), Triangle United v Chicken Inn (Gibbo).
