uMthunywa
YiNtatheli kaMthunywa
UMQEQETSHI weTriangle FC uKelvin Kaindu ubike ngokuzithoba ukuthi inhloso yakhe ayigxilanga kunkezo yePSL kuphela kodwa ufuna ukuguqula indlela ithimu le edlala ngayo.
UKaindu uxoxisane loMthunywa kuliviki lapho aveze ukuba ukukhwela phezulu kwengalane okwenziwe yithimu yakhe kulimpelaviki akumangalisi.
Uthe akulasizatho sokuthaba kakhulu ngokukhokhela ilogu njengoba kuseselomango ukuthi isizini yalonyaka iphele.
Lokhe yangena kuligi ephakemeyo, iTriangle iyachinsa ukukhokhela ingalane yamathimu. Ekuqaleni komnyaka, ithimu le ihle yakubeka egcekeni ukuthi ihlose ukudlala inguqu etshengisela ukuthi iyayifuna inkezo.
Iqembu leli elazakala ngokuthi yi “Sugar Boys” kubalandeli balo, lidonse nzima kumasizini adluleyo uKaindu engakabuyi.
Sebengene batshintshana abaqeqetshi kulithimu kodwa kusehlula ukuthi basondelele ukukhokhela ilogu.
Lonyaka likhangelelwe kakhulu ngabasekeli balo ukuthi lilethe injabulo emangweni weTriangle.
UKaindu wazise iphephendaba likazulu ukuba uselungise ithimu wayiphenduphendula ukuthi yesatshwe lonyaka.
“ITriangle yiyo ithimu yokubukela kumidlalo eseleyo kulisizini. Sengiyilungise yaphelela. Inhloso asikuthatha inkezo kuphela, kumele siqale ngokudlala kuhle.
“Ngilesiqiniseko sokuthi lonyaka kusiyaphela iligi, iTriangle izabe isesatshwa. Labadlali bazimisele kakhulu.
Ngilethemba abantu abanengi bakukhangele lokhu,” kutsho Kaindu.
Iqembu leli alizange lenze amawala okuthenga abadlali, okutshengisa ukuthi uKaindu uyasuthiseka ngabafana alabo.
UKaindu ukhokhela ilogu kanje okuyinto aseyenze okweminyaka emine. Esesengumqeqetshi kuHighlanders,
uKaindu usesaziwa ngokubeka ithimu yakhe kunombolo engedluli eyesibili kulogu.
Usekwenzile kuTriangle. Ngokuma kwengalane yeTriangle ilemiklomelo engu-32 ngemva kokuhlohla amabhola angu-33.
Ngalokhu, uKaindu uthe kumidlalo eseleyo kuzatsheka amabhulugwe ngeqembu lakhe.
