uMthunywa
Ethel Ncube
ZILOKHE zidabukile njalo zisesizini izihlobo zakoMafusini, eMakhandeni koBulawayo kulandela ukubhujelwa ngugogo oleminyaka engu-99 ngemva kokugula okwesikhathi eside.
Ugogo uZuzile Mafusini ubhubhe mhlaka 1 Lwezi kuwonalo umnyaka wathola ukuhlonitshwa nguBulawayo wabekwa emathuneni eLady Stanley.
UMthunywa uzwe ukuba ayisiyo muli yakoMafusini yodwa elahlekelweyo ngokwedlula kukagogo lo kodwa izakhamizi zeMakhandeni lazo zilahlekelwe ngoba ubeqakathekile emphakathini engumuntu olaya njalo efundisa omama ukuziphatha kanye lokuthi bagcine njani imizi yabo.
Ekhuluma loMthunywa uMnumzana Abednego Tshonisa Mpofu uveze ukuthi uzwe ubuhlungu kakhulu ngokutshiywa ngumamazala wakhe.
“Ugogo utshiye isizungu esikhulu kakhulu ngoba ubenguye olaya abantwana ebafundisa ukuthi baziphathe lokuthi bakhule belalela abazali babo. Sizamkhumbula ngemisebenzi yakhe emihle ayenzayo,” kulandisa uMnu Mpofu.
Uqhubekele phambili eveza ukuthi ugogo uMafusini ubengumuntu okhuthaza abantu ukuthi badle ukudla kwesintu okuyikho okwakha umzimba.
“Ukuze aphile afike iminyaka le engu-99 ubezidlela ukudla kwesintu esithi yikho okuqinisa umzimba njalo akula mkhuhlane okuhlaselayo. Ubecebisa abantu ukuthi badle imifushwa yolude, ibhobola, idobi, amazambane lokunye nje okwesintu. Ubengala omunye umkhuhlane obumkhathaza ngaphandle kwesifuba kuphela. Ubengugogo okhutheleyo esenelisa ukuzenzela izinto ezinengi. Ubelima emasimini ahlakule avune ethi wenzela ukuthi umzimba wakhe ungagugi masinyane ngokuhlala,” kulandisa uMnu Mpofu.
Iphephandaba likazulu lixhumane lomunye wabantwana bakagogo uMafusini oveze imbali yakhe uNkosikazi Rhoda Mpofu.
“Kubuhlungu ngoba sikhuluma ngomuntu osezithulele nje kodwa umama uzelwe ngo1916 eSotshe, eMatopo.
Utshiye umntwana oyedwa oyinkazana, abangu-9 sebatshona. Ekukhuleni kwakhe wayekhuthele esebenza, elima, imali yayivela ezandleni zakhe. Ubethanda ukwetha inganekwane, nxa umuntu engaphambanisa engakakukhuzi uqala ngensimu uhle uzizwele ukuthi nguwe ophambanisileyo ulungisise amaphutha akho,” kutsho uNkszn Mpofu
Intatheli ibuye yakhulumisana lesikhulumi semuli yakoMpofu uMnumzana Johnson Majele Sibanda oveze ukuthi lokhe bedabukile.
“Inkosi iyapha iphinde ithathe, besesifikile isikhathi sikagogo Mafusini. Siyamncoma ngokuziphatha kuhle okumkhokhele waze kwafika lelilanga njalo sijabulela ukuthi ufele eNkosini eselikholwa lebandla leSeventh Day Adventist. Sithi lala ngokuthula ndlovukazi yakoMafusini,” kuphetha uMnu Sibanda.
