uMthunywa
Cornelius Luphahla
IZAKHAMIZI zakuWadi 3 eMbembesi zikhala sililo sinye ngemva kokulahlekelwa ngumthenjwa wazo okubikwa ubesezithuthukise okumangalisayo ngokuzenza zibambane kanye lokuzimela endaweni ezehlukeneyo ezidinga ukumelwa.
Iqhawe leli kubikwa nguMnumzana Christopher David Gazi obhubhe eleminyaka yokuzalwa engu 49 ngesizatho esingaqondakaliyo njalo utshiye abantwana abathathu, amankazana amabili kanye lomfana oyedwa.
UMthunywa uvakatshele kule indawo uNkosikazi Magerete Mtungwazi wachaza ukuthi ulokudabuka okukhulu ngoba umuyi ubebaphethe kuhle esigabeni.
“Baqinisile sibili ukuthi isitsha esihle kasidleli, ngitsho ngoba umuyi uGazi ubesebenza gadalala esigabeni lapha nguye njalo obedingela abantu ukudla njengoba nje indlala ingaka. Okunye njalo umuyi njengomntanami ubekwazi ukuhlonipha abantu kanye lokubaphatha kuhle,” kutsho uNkkz Mtungwazi.
UMgcinisihlalo kaWadi 3 uMnumzana Vethi Tshuma ubikele intatheli ukuthi uMnu Gazi ubelomsebenzi omkhulu kakhulu esigabeni njalo ubezasithuthukisa isigaba sabo.
“Ngendlela umuyi abesebanza ngayo ngidabuke kakhulu ngoba ngilahlekelwe. Ubengu Ward Commissar abuye njalo abe nguCo-odinator weZanu-PF kuWadi 3 kutshengisa ukuthi ubesebenza gadalala. Ngakho mina njengoMgcinisihlalo weWadi ngisele ngilesithuli esikhulu ngokulahlekelwa yindoda ebisebenza kangaka.
“Okunye njalo umuyi ubesebenza njalo langaphandle kwebandla leZanu-PF ngoba nguye obethenjiwe ekuhlanganiseni abantu ikakhulu nxa kukhulunywa ngengqubekela phambili,” kutsho uMnu Tshuma.
UMnumzana Moses Moyo onguConstituency Co-odinator kuZanu-PF eMguza uchaze njalo umuyi njengomuntu olesibindi njalo osebenza gadalala.
“UGazi ubengumuntu olesibindi njalo okwaziyo ukwenza umsebenzi wakhe. Okunye njalo umuyi ubengelankethabetshabi ephatha umuntu wonke ngendlela efanayo.
“Ngalokhu ngithi abantu bakule indawo kabenze njengaye baqhubekele phambili besebenza kuhle njengaye ukuze bathuthuke,” kutsho uMnu Moyo.
Usobhuku wakule indawo ongumnewabo kamuyi uMnumzana Vanisha Nkomo ubikele intatheli ukuthi ulokudabuka okukhulu.
“Ngilokudabuka okukhulu ngokulahlekelwa nguGazi ngoba ubeyindoda emadodeni. Ngokubona kwami uWadi 3 wonke udabukile ngoba umuyi ubesiphethe kuhle kakhulu yikho nje labantu beze ngobunengi babo,” kuphetha uMnu Nkomo.
