uMthunywa
Samkelo Tshuma
MINYAKA yonke usapho lweZimbabwe lunanza usuku lwamaqhawe eZimbabwe anikela impilo zawo ukuthi sithole uzibuse. Abaculi bakoBulawayo ngabanye babantu abaziqhenya ngesenzo esenziwa ngamaqhawe akithi.
Kuliviki intatheli zikaMthunywa zithintane labaculi abatsha bakoBulawayo ngenhloso yokuzwisisa ukuthi litshoni kibo ilanga labalweli benkululeko.
Abaculi abalodumo ababalisa uFredrick Moyo odume ngokuthi nguZhezhingtonz, Friends Band kunye loMqondisi Sibanda odume ngokuthi nguDJ Skaiva utshengise ukuba leli lilanga eliqakathekileyo empilweni yakhe ngoba kungasimaqhawe anikela impilo zabo ngabe akula njabulo empilweni zabo.
“Lelilanga liqakathekile empilweni yami ngoba nginanzelela ukuba ngiyenelisa ukutshaya umculo wami ngikhululekile.
“Akulamuntu ongincindezelayo ukuthi ngisebenzise isiphiwo sami ngendlela engifisa ngayo. Konke lokhu kungenxa yamaqhawe anikela impilo zawo ukuze ngithole linkululeko engilayo lamuhla,” kutsho uDJ Skaiva.
Iqembu elibizwa ngokuthi yi-Friends Band lalo litshengisa ukujabula okukhulu nxa kukhulunywa ngelanga lokuthakazelela amaqhawe eZimbabwe. Liveze ukuba linxuswe endaweni ezitshiyeneyo ukuthi liyedlala umculo walo lithokozela ilanga leli. Elinye ilunga laleliqembu u-Ebba Chitanga ulandise ukuba bayabe bejabulela ukuthi ekucineni kwakho konke iZimbabwe yathola izibuse.
“Kulendawo ezinengi esinxuswe khona ukuthi siyedlala, sithakazelela inkululeko esayilethelwa ngamaqhawe akithi, futhi siyabe sihlonipha lalabo abanikela impilo zabo ukuze thina sithole uzibuse” kutsho uChitanga.
Umculi owaziwa ngokuthi nguZhezhingtonz uveze ukuba uyalithakazelela ilanga leli ngoba umsebenzi owenziwa ngamaqhawe waletha ukuthula kwelakithi, akufani lakwamanye amazwe lapho othola kulobudlwangudlwangu.
“Ilanga leli liqakathekile kimi njalo ngiyafisa ukuba ngabe lonke usapho lweZimbabwe luyalunanza lolusuku ngoba lamuhla silokuthula elizweni ngenxa yomsebenzi owenziwa ngamaqhawe.
“Ngeviki ezayo ngiyabe ngiseGwanda sinanza lolusuku, kulo Miss Heroes ngakho nginxuswe ukuthi ngiyecula kulumcimbi ozabe useMkhekhelezi Leisure Centre,” kutsho uZhezhingtonz.
