uMthunywa
Cornelius Luphahla
KUZABE kusindwe ngobethole mhlaka 29 Mabasa edolobheni lakoBulawayo lapho okuzabe kulomkhosi wokukhetha isiqamulayezi setshatshazi kuleli esisathatha isicoco sokuba nguMiss Africa Zimbabwe.
Umkhosi lo uzakuba khona phakathi kuka10 Avenue lo Jason Moyo edolobheni lakoBulawayo ngehola lika7 ntambama kuyelamula ukuphuma kwelanga lapho inhlanganiso yeFingers Academy eyabe imeme khona uzulu wonke ukuba azozibonela ukukhethwa kwentombi enhle ukwedlula zonke ezakuleli kulandelwa ubuhle balapha eAfrica.
UMthunywa uxhumane loAmbassador walo umkhosi uSandra Ndebele wachaza ukuthi emkhosini lo kukhangelwa ubuhle balapha eAfrica kuphela.
“Sinanzelele ukuthi izikhathi ezinengi intombi eyabe ikhethwe ukuyamela ilizwe kayiphumeleli phandle kweAfrica. Yikho okudale ukuthi sibe lomkhosi wokuncintisana kwamantombazana sikhangela ubuhle balapha eAfrica kuphela,” kutsho uSandra Ndebele.
Ekhuluma loMthunywa uMqeqetshi wenhlangiso yeFingers Academy uSarah Mpofu uchaze ukuthi umkhosi lo wokuncintisana kwamantombazana kulandelwa ubuhle beAfrica wadabuka eBotswana.
“Umkhosi lo wokubukisa ubuhle bamantombazana kukhangelwa ubuhle balapha eAfrica udabuka eBotswana njalo ngokokuqala ukwenza umncintiswano le kuleli,” kutsho uSarah Mpofu.
Uqhubekele phambili njalo waveza ukuthi bahamba izabelo zonke ezikuleli bekhetha amantombazana amahle njalo.
“Ekukhetheni kwethu amantombazana la sahamba izabelo zonke kanye lezigaba zakuleli sikhetha amantombazana amahle sasesisenza umcintiswano wakuqala okuyikho okwaphuma khona abanye khathesi sesisele labangu-16 kuphela.
“Yibo-ke abazabe bencintisana ngobuhle ngalelolanga njalo esizathola khona uMiss Africa ozamela iZimbabwe yonke emazweni.
“Lokhu kuyavuselela amasiko ethu ngoba nxa sikhangele ubuhle balapha eAfrica kudala ukuthi abantu bavuselele ukugqoka kwesintu kanye lokuziphatha kwakhona okuyikho ukuvuseleleka kwamasiko.
“Sinanzelele ukuthi kuqakathekile ukuba umkhosi lo siwenze ngensuku zeTrade Fair ukuze umphakathi uzibonele njengoba kuzabe kulabantu abanengi lapha koBulawayo besiza embukisweni lo. Sikhuthaza uzulu wonke ukuthi akhululeke azozibonela ngamehlo umncintiswano lo,” kuphetha uSarah Mpofu.
