uMthunywa
Zintatheli zikaMthunywa
ZIZIDLA amathambo engqondo izakhamizi zesigabeni sakoBidi eKezi ngemva kokuba esinye isalukazi siveze ukuba otsikamutanda abasebenza kule indawo basebenza ngendlela esolisayo.
Kubikwa sokulesikhathi otsikamutanda laba besebenza kule indawo njalo kunengi okubikwa sebakukhipha emizini yabantu kugoqela inyoka, izikhova, ofudu kanye lendiwo ezilegazi abayabe besithi ngezabantu.
Kubikwa emavikini asanda kwedlula otsikamutanda laba abazibiza ngokuthi nguBishop Sweswe lezithunywa zenkosi baveze omunye ubaba bethi ugcine umbane egabheni, kwazakuthi omunye ugogo kwathiwa ulesikhova, ufudu kanye labomangoye abebasebenzisa ukukhunkula.
Ekhuluma loMthunywa omunye umfakazi ohlala kulesi sigaba othande ukubizwa ngelokuthi MaNcube nje kuphela uthe indlela otsikamutanda abasebenza ngayo iyasolisa ngempela.
“Abantu abanengi sebekhitshelwe izinto lapha, uMaSibanda bathi bambambe lofudu lesikhova, lomunye ubaba webandla leZCC okuthiwa ulombane egabheni.
“Iyasolisa indlela abantu laba abasebenza ngayo khepha phela bangasebenza badinga ukubhadalwa njalo nxa sokusiza ekubhadaleni uyikhipha ngamakhala imali kumbe usale ungaselazifuyo esibayeni,” kutsho uMaNcube.
Intatheli zikhulumisane loNkosazana Joyce Ndlovu okungugogo ohlala kulesisigaba waveza ukuthi ulokhu esadidene ikhanda ngendlela otsikamutanda laba abamveza njengomthakathi ogcine amaqhaga amabili agcwele igazi labantu phakathi.
“Mina ngafika kubaphurofethi laba ngifuna ukuzwisisa ngomntanami owabhubha okungazwisisekiyo nyakenye, ngimangele ngilapha sokuthiwa wabulawa yimi.
“Engingakuzwisisiyo yikuthi bathi bethatha indiwo zami bathela umlotha lomuthi okuthiwa yiGentian Violet (GV) ngikhangele bathi udiwo solulegazi lona luhlala lungelalutho. Baluthwala balutshengisa abantu bathi yilo olubulala abantu.
“Ntambama wafika uSweswe ngokwakhe efuna imali ngodlakela wangilandela waze wangena lami endlini yami yokulala bathatha i$300 wathi ngingatsheli muntu ukuthi ngimuphe imali. Kambe ngumphurofethi bani olandela isalukazi endlini yokulala,” nguNkszn Ndlovu lowo.
“Lokhu kwangihlukuluza ngoba babefuna lenkomo bethi bafuna ukulungisa umuzi wami ngoba kulokufa kodwa mina ngala ngoba ngisazi ukuthi akutshoyo akusiqiniso. USweswe waphikelela ethi kufanele ngimuphe inkomo ngoba udla ngokuhlanza imizi yabantu,” kutsho uNkszn Ndlovu
Abanye abantu esigabeni lesi baveze ukuthi indlela omagayiva laba abaphatha ngayo abantu yiyo etshengisa ukuthi abalaqiniso ngezenzo zabo zokuhlukuluza abantu.
UMthunywa uphinde wakhulumisana losobhuku njalo ongumabhalani weNduna uBidi uMnumzana Nkosana Moyo waveza ukuthi laba bantu balamanga ukuthi banxuswa yinduna.
“Abafana laba ngabafana abancane abakubhizimusi yokuqila abantu nje. Sebahuquluza impahla zabantu njalo sokuyinhlalayenza ukuthi baxabanise abantu lapho abahamba khona. Kuke kwaba lendaba ebuhlungu kulindawo lapho esinye isakhamuzi esazibophela khona ngenxa yokwetheswa elobuthakathi. Kasisabafuni lapha, kabasuke esigabeni.
“Okunye nje okubi yikuthi batshela abantu ukuthi banxuswa yinduna kodwa lokho ngamanga, induna uBidi ayizange ibize abantu laba,” kuphetha uMnu Moyo.
Imizamo yokukhulumisana lenduna uBidi yehlule ngoba ucingo lwakhe belungadojwa.
