uMthunywa
Cornelius Luphahla
UMCULI wodumo wakuleli ocula umculo kamaskandi usekhethiwe njalo ukuba angene emncintiswaneni we-Best Song of the Year, ngemva kokuthola kwakhe indondo ezintathu ngomnyaka ophelileyo.
Umculi lo, uPossnet Khumalo ivithikazi lentombi elidabuka eTsholotsho kwezomculo laziwa ngokuthi Igqishamnkantsha usekhethwe njalo emncintiswaneni wengoma emnandi kulazo zonke kwezikamaskandi.
UMthunywa uxhumane loGqishamnkantsha wachaza ukuthi uzwa ejabula ngokukhethwa emncintiswaneni lo wabuya walandisa ngokuthola kwakhe indondo emnyakeni ophelileyo ebonga njalo ekhuthaza uzulu ukuthi amsekele ngokumvotela.
“Ngizwa ngijabula kakhulu ngokukhethwa emncintiswaneni weBest Song of the Year ngoba emnyakeni ophelileyo ngithole indondo ezintathu ngedlalade lami elithi Mina Nawe. Emncintiswaneni lo sasingabaculi abangu-23 kuthi abakoMthwakazi sasibabili. Lonyaka sincintisana singabaculi abangu-17 ngokunjalo abaphuma kweleZimbabwe sibabili.
“Lonyaka ingoma yami ekhethiweyo ngethi Baphelamanz’amnyama ekudlalade lami elithi Mina Nawe.
“Ngikhuthaza abalandeli bami ukuthi baqhubekele phambili ngokungivotela njengalokhu abakwenza emnyakeni ophelileyo njalo ngibathembisa ukubakhiphela elinye idlalade elitshisayo lonyaka,” kutsho Igqishamnkantsha.
UMduduzi Mkhwananzi omunye wabacula leGqishamnkantsha ubikele intatheli ukuthi ulethemba lokuthi bazayithatha indondo wabuya wathi bakhangelele ukukhipha amadlalade amabili lonyaka ngenhloso yokujabulisa uzulu.
“Mina ngilethemba lokuthi abalandeli bethu bazasisekela siyithathe indondo njalo sikhangelele ukuthi sikhiphele uzulu amadlalade amabili atshisayo.
“Elakuqala ngelaBaxhaphazi elizaphuma ngoMabasa kuthi elesibili ngeleGqishamnkantsha ngakho lizaphuma ngoMpandula,” kutsho uMduduzi Mkhwananzi.