uMthunywa
Johas Moyo
ABE-Meteorological Department kuleli sebeveze ukuthi abalimi kumele bahlale bedinga ulwazi ngezomumo womkhathi yikho nje sebesungule indlela yokubapha ulwazi lolo kubomakhalekhukhwini kanye lasebulenjini.
URodgers Munyira onguMeteorological Officer esabelweni seMatabeleland South uthe abalimi kumele balandele ukuguquka komumo womkhathi osekukhona njalo indlela inye kuphela ukuthi bakwazi lokhu ngokughlala bexhumana labo.
“Sesinanzelele ukuthi kuminyaka yonale emibili edluleyo indlela izulu elina ngayo isiguqukile kungakho abantu kumele balandele wonalo umumo osukhona ukuze bangabulawa yindlala.
“Kuyonale iminyaka esidlule selisina ekucineni ngesikhathi esasisiba ngesokulungiselela ukuvuna. Lokhu sokubangele indlala enkulu kakhulu endaweni ezinengi kungakho sikhuthaza abalimi ukuthi kabadinge ulwazi ebulenjini ngoba kuzabe kufakiwe konke okumele babekwazi ngomumo abakhangelane lawo,” kuchasisa uMunyira.
Uqhubekele phambili wathi njengeMeteorological Department bayafaka konke abazi ukuthi abalimi kumele babekwazi ebulenjini kungakho kumele basebenzise lelo thuba.
“Sesinanzelele ukuthi akulamlimi ongela makhalekhukhwini kungakho bangahlaba nje u *130*1# nxa besebenzisa ilayini yeNetOne bazathola konke abakudingayo ngomumo womkhathi njalo balakho ukukhetha ukuthi bafunde lokho ngolimi abaluzwisisayo kungaba yisiNdebele, isiShona kumbe isiLungu.
“Uhlupho nje yikuthi khathesi i-system yethu isebenzisa iNetOne nje kuphela kodwa umhlobo wefoni kawukhathalekile yiloba yiphi uyathola konke okumele ubekwazi ngomumo womkhathi ukuze ulime izilimo ezihambelana lomumo okhona,” kutsho uMnu Munyira.
Uphethe ngokuthi ukuguquka komumo womkhathi okukhona kudinga ukuthi abalimi bakwazi isilinganiso sezulu elikhona, kanye lokuthi umhlabathi wabo ufunani ukuze balime izilimo ezihambelana lalowo mumo.