uMthunywa
Ethel Ncube
INHLANGANISO yabalimi yeAgritex isikhuthaze abalimi endaweni ezilezulu elilutshana ukuthi bangakhalali ukulima ngoba isikhathi sokulima sika2015/2016 kasikapheli kungakho kungenzeka izulu line.
UMnumzana Dumisani Mbikwa Nyoni onguProvincial Agricultural Extension Officer wesabelweni seMatabeleland North uveze ukuthi kulendawo lapho izulu elingakani khona njalo abalimi bakulezondawo kabazihluphi ngokulima ngoba komile.
“Bakhona abalimi abahle bakhalala ukulima lonyaka ngoba bebona izulu lingakani kukanti njalo bakhona abanye abalimi abafaka inhlanyelo yabo phansi kodwa yabola okwenza bonke laba abalimi bakhalale ukulima.
“Ngithanda ukukhuthaza abalimi ukuthi isikhathi sisekhona sokuthi balime inhlanyelo ezivuthwa masinya ukuze lapho izulu eliyabuyela khona izilimo zabo zimile njalo izulu lithi lihamba sezivuthiwe,” kulandisa uMnu Nyoni.
Uqhubekele phambili wathi abalimi bangavilaphi ukuphinda balime lapho okungamilanga khona.
“Abalimi kabaqabange lapho okwala khona ukuthi kumile ukwenzela ukuthi izulu lingana kumile ukuze bathole isivuno siphezulu,” kutsho uMnu Nyoni.
Ekhuluma lentatheli uMnu Nyoni uveze ukuthi indawo esilinyiwe lonyaka iphansi kakhulu kuleminyakeni edluleyo esabelweni seMatabeleland North ngenxa yokuthi izulu kalikani njalo abanye abalimi sebekhalele ukulima.
“Endaweni ezinengi izulu lakhiza nje ledlula kodwa lokho akutsho ukuthi abalimi badele bathi kabasalimi lonyaka.
Isikhathi sisekhona, lingana laloba ngoZibandlela kuyangenwa emasimini kulinywe inhlanyelo ezithatha inyanga ezintathu ukuthi zivuthwe.
“Okunye njalo abalimi bangahlanyeli umumbu wodwa kodwa balime ezinye izilimo ezifana lamabele, indumba, inyawuthi, amajodo, amakhabe lamathanga ukwenzela ukuthi umumbu ungatsha babe lakho okunye ukudla,” kutsho uMnu Nyoni.
Uphethe ngokucebisa abalimi abasendaweni ezilezulu elinengi ukuthi balime kakhulu ukuze kulwiswe indlala kuleli.
“Zikhona indawo ezilezulu elinengi kungakho abalimi bakulezo ndawo kabakhuthale bahlakule njalo bahlale njalonje behlola ukuthi akulazibungwana ezihlasela izilimo zabo ezibalisa ubutata obudla umumbu njalo obucina busehlisa isivuno somlimi,” kuphetha uMnu Nyoni.
