uMthunywa
Johas Moyo
ABE-AGRITEX ababona ngeze-horticulture bakhuthaza abalimi ukuthi balime amatamatisi ngoba kukhanya bebalutshwana abawalimileyo kukanti wona alenzuzo enhle kakhulu.
UNkosazana Treggy Mpofu oyingcitshi kweze-horticulture ukhuthaze abalimi ukuthi balime imihlobo etshiyeneyo yamatamatisi ukuze abathengi bazikhethele imihlobo abayifunayo.
UNkszn Mpofu uveze ukuthi abalimi kumele balandele indlela eziqondileyo zokulima amatamatisi njalo badinge ulwazi olufaneleyo ukuze bazitholele imali.
“Kuqakathekile ukuthi abalimi bahlolisise umhlobo wenhlabathi yabo bengakalimi amatamatisi abo. Ngemva kwalokho kumele bazi ubunengi bamanzi atholakala kuleyondawo kanye lobumunyu bawo ngoba lokhu kuphathisa abalimi ukuthi bakwazi ukuthi amatamatisi abo ayavuma yini kuleyondawo,” kutsho uNkszn Mpofu.
Uqhubekele phambili uNkszn Mpofu ekhuthaza abalimi ukuthi ngemva kokuthola ulwazi ngenhlabathi abalimi bazakuba kwazi umhlobo womvundiso okumele bawusebenzise.
“Umlimi nxa esekwazi umhlobo wenhlabathi yakhe usekwazi ukuthi asebenzise ifethalayiza yohlobo lwe-basal fertiliser kumbe i-folio esetshenziswa ukufafaza amatamatisi njalo yenza izilimo lesi sikhule kuhle njalo lesivuno sibe phezulu.
Uqhubekele phambili ekhuthaza abalimi ukuthi ngazo zonke izikhathi kumele bananzelele ukukhula kwesilimo sabo njalo lokuthi asila mikhuhlane.
“Abalimi kumele bavikele amatamatisi abo kumikhuhlane lezibungu ezenza engavuthwa kuhle, loba avuthwe ebozisa, amanye ebola elezibungu lemphehlane (ball worms, red spider, cutworm) kanye lokuvikela izilimo ekutshisweni lilanga.
“Kulemithi abalimi okumele bayisebenzise ukubulala izibungu lezo kanye lesikhathi okufanele bafafaze ngaso.
Uphethe ngokukhuthaza abalimi ukuthi kumele baqaphele ukuthi ukudla okusenhlabathini kutholakala ensimini yonke hatshi kwezinye indawo.
“Umlimi wamatamatisi kumele abe ngumuntu ohlanzekileyo njalo abone ukuthi uyagezisa amatamatisi nge-copper oxycloride umuthi obulala amagcikwane njalo bananzelele isikhathi lapho okumele baqalise ukulima ngaso amatamatisi ikakhulu kukhangelwe isikhathi azahlala ngaso beqathanisa lemihlobo yamatamatisi ebalisa awe-salad, canning lamanye nje awokwenza imisobho,” kuphetha uNkszn Mpofu.
