uMthunywa
Thando Dube
ABALIMI bakhuthazwa ukuthi balime i-soya beans ngoba zilenzuzo enkulu ngoba zisetshenziswa ukwenza ukudla okutshiyeneyo njalo okwakha umzimba.
I-soya beans ngumhlobo wendumba olomkambo omangalisayo ngoba kuyisilimo esisetshenziswa ukwenza ukudla okutshiyeneyo okugoqela ama-chucks, amafutha okupheka, uchago, njalo zingaba yisitshebo, amahlamvu alakho ukudliwa yizifuyo.
Ekhuluma loMthunywa uMnumzana Thando Ndlovu ongumlimi ukhuthaze abalimi kundawana zonke zelizwe ukuthi balime i-soya beans ngoba zilomkambo omuhle njalo obanzi.
“Abalimi kabalime i-soya beans ngoba kuyisilimo esilomkambo obanzi njalo omuhle. Ubuhle bokulima lezindumba yikubana zilomsebenzi omangalisayo ikakhulu ekwenzeni ukudla okwehlukeneyo okuthakazelelwa ngabantu abanengi ngoba ziyaqinisa umzimba ngakho umlimi olima lezi indumba uthola inzunzo ephezulu ngemva kokuzithengisa,” kutsho uMnu Ndlovu.
UMnu Ndlovu uphinde wathi i-soya beans zilimeka ngesikhathi sokutshisa njalo esezulu.
“Isilimo se-soya beans sivuma ngesikhathi sokutshisa njalo esezulu ngakho umlimi ofisa ukulima isilimo lesi kaqalise ukulima. Ekulimeni, umlimi kufanele ahlanyele endaweni elimeke kuhle njalo okungela khula. Inhlanyelo ibisifakwa phansi kanye lomvundiso igqitshelwe,” kuchaza uMnu Ndlovu.
UMnu Ndlovu uthe ekuvuneni umlimi ulakho ukuthengisela amankampani kanye labantu ngoba isilimo lesi silomsebenzi.
“Manengi amankampani athenga isilimo se-soya beans ngoba sisetshenziswa endaweni ezinengi. Umlimi ulakho njalo ukuthengisela abantu kazana ngoba indumba lezi ziyisitshebo esihlabusayo.
“Amahlamvu e-soya beans wona ayikudla kwezifuyo ngakho umlimi uyathola inzuzo enhle ngokulima isilimo lesi,” kuphetha uMnu Ndlovu.
