uMthunywa
Izikhathi zamakhefu ePhasika kuba zindaba ezinhle kakhulu kwabahlala emadolobheni ngoba amankampani abawasebenzelayo ebanika okuzinsukwana zokuphumula.
Bonke babhekise amabombo emakhaya, nanko phela ngalesi sikhathi lehlobo lihlabile. Abamabandla ezinkonzo labo bayabe benanza ukufa lokuvuka kwendodana kaNkulunkulu. Abanye ngabahamba baye enhlane ezintabeni zokhahlamba ezikude.
Ekuhambeni lapha sikhumbule ukuthi umkhuhlane we-corona lokhe ukhona phakathi kwethu ngoba ekuvakatsheni sihlangana lezihlobo labangane abavela kumagumbi wonke womane omhlaba. Abanye ngabavela emazweni aphetsheya kolwandle, sikhumbule ukuzivikela ngokufaka izayeke zethu.
Labazakuya emakhaya sifike sidle kuhle ihlobo, ngiyazi kuzohlatshwa kosiwe kulalwe ngesibomvu. Ngikhumbula omunye umngane wami salala singalele nyakenye edle inyama ewosiweyo, ephekiweyo, wadla amasi qede wagqiba iziqu zomumbu lamakhabe, waqala ngokubhodla isibhoho, athi angabhodla kunuke sengathi liqanda elithubeleyo.
Ebusuku kazange abuquthe, waqala esaya esambuzi wacina esebhoda ngemva kwendlu, ecabanga ukuthi izinja zizavuka zidlile kanti kabuzanga elangeni, yavuka indoda endala isibutha ngefotsholo ingcekeza yayo.
Abalezisu ezilula kungaba ngcono uthwale uyekudla phambili, njalo ungadli udlulise amalawulo, funa ukudla kukugulise besekuthiwa yi-corona njengoba kuyabe kuyisikhathi sekhefu.
Labantwana besikolo lizibambe bokhekhe ukwenzela ukuthi nxa sezivulwa kungabikhona okuphazamisa ukufunda kwakho, nanku le-corona lokho isehla isiya nganeno, phela kumele lizame ngamandla wonke ukuthi isikhathi lesiyana zivalwa ngesikhathi umkhuhlane ubhahile siyakhwitshizwa ngokubala, udonse gadala njengekamela lamajuta.
Ngiyazi amakhefu manengi kulalabo ilanga likazibuse lesikhathi sombukiso weZimbabwe International Trade Fair lizibambe ukwenzela ukuthi libuyele esikolo lingabaphilileyo lengqondo seziphumule zalolongeka zacija okomkhonto webutho likaTshaka.
Lathi sidle imali sikwazi ukuthi ziyophinde zivulwe ungahungwa lihlobo ubusuthatha imali zesikolo ugadise ibhasi, izikolo sezivulwa uthole usuhlahle amehlo angani ngumuntu ogade isitimela esingayisiso, ususehluleka ukukhokhela indleko zesikolweni.
Ngithi kini lonke libe lePhasika elilitshukela, uNkulunkulu alenzele okuhle.
Ayixabene.
