uMthunywa
Thokozile Mbedzi
KUBOTSHWE izigelekeqe ezimbili ebesezihluphile elokitshini leMbizo eKwekwe ngokugqekeza ezindlini zihlome ngamabhemba kusukela ngenyanga kaNtulikazi kusiya kwekaNcwabakazi.
Kubikwa abetheswacala uJohn Nyirenda oleminyaka engu-34 weMbizo, eKwekwe kunye loMunashe Ruvhevhe oleminyaka engu-24, ongelandawo yokuhlala kunye labanye ababili abalokhu bengakabotshwa bebegqekeza ezindlini eziselokitshini leMbizo eKwekwe behlome ngamabhemba betshontsha impahla etshiyeneyo.
Omele isikhulumi samapholisa eMidlands uAssistant Inspector Fungai Ngawagare uqinisekise ngokubotshwa kwezigelekeqe ezimbili ebezigqekeza ezindlini zihlome ngamabhemba.
“Abetheswacala bagqekeza ezindlini ezintathu behlome ngamabhemba, amarekeni, ingqamu kunye lezitolo ezimbili batshontsha imali, omakhalekhukhwini kunye lokudla.
“Ukuchwayisisa kwamapholisa kubangele ukuthi kubotshwe abetheswacala ababili kwatholakala omakhalekhukhwini ababili ababatshontshayo, amabhemba asetshenziswa ukudala amacala la.
“Omamangala ababili benelise ukuthola impahla zabo ezatshotshwayo,” kuchasisa uAsst Insp Ngawagare.
Abetheswacala laba bakhangelelwe ukumiswa emthethwandaba maduze.
UAsst Insp Ngawagare uphethe ngokubonga abancedise ekubotshweni kwalaba ababili.
“Sithanda ukubonga uzulu oncedise amapholisa ngolwazi lokuthi abetheswacala laba bangaphi okusize ukuthi babotshwe.
“Sicela njalo uzulu ongabe elolwazi olungasiza ekubotshweni kukaAdmore Mtethwa loThemba abalokhu bengakabotshwa ukuthi babikele amapholisa aseduzane labo,” kuphetha isikhulumi lesi.
