uMthunywa
Ngekhefu leKhisimusi savakatshela endaweni ezitshiyeneyo okulezihlobo labangani, ngangilomzawami osebenzela ibhanga elikhulu lomhlaba (World Bank), saqala ngokuya lapho okulenkaba zethu ngitsho lapho esizalwa khona.
Safika kwahlatshwa imbuzi sadla kwajatshulwa kuthe selibantu bahle sabhekisa amabombo endaweni yakithi lapho okuthengiswa khona ugologo. Njengomuntu ohlala khatshana umzawami wayelayitshile ethwele amadola eMelika kuphela.
Wathenga sanatha, obesikhiwa ngitsho inyembezi zikaQueen sasikhame amambodlela. Ngathi sengisiya endlini encane ngithi ngichithe amanzi ngabizwa nguntombazana. Nxa ngingaphosisi wayengalingana lezibulo lami, ngema ngifuna ukuzwa ukuthi uthini mhlawumbe kwakungumuntu ongaziyo ngezwa ethi ngiyathengisa.
Ngazibuza ukuthi angabe ethengisani njengoba wayengaphathanga lutho ezandleni.
Ngasengimbuza ukuthi kambe engabe ethengisani njengoba letafula engangisithi mhlawumbe angabe echaye khona amacimbi kumbe amaqanda yayingekho, watsho ekhomba phakathi kwemilenze yakhe, ngezwa ngisenyanya, ngazonda nganuka okobulongwe bechalaha obunethwe yimvimbi yembolisamahlanga.
Okwangicaphula kakhulu yikuthi lumntwana wayengidelele njalo ngakhumbula ukuthi uphose abengusowabo wezibulo lami, njalo wayethi ufuna ngimphe impondo, yiyo imbadalo yakhona.
Ngamphendula ngelilodwa ngathi kayisikho engikulandileyo, ngangizokhipha amadino. Sengiphethwe kubi yilokho sahle saphanga sasuka lomzawami saya kwesinye isabelo esakhelene laso, lapho-ke kwakukompunzi edla emini.
Isisanasana umtshado wezinja ngempela, sathi simisa imota bahle bathutsha begijima abesifazana abane bonke belwisa ukufika efasitelini lemota kuqala.
Ababili babegqoke phezulu ngaphansi bengavunulanga lutho igolide lonke lisegcekeni. Sobabili sakhangelana qede umzawami watshaya imota.
Ngemva kokuthula ngamuzwa esithi, “Mzala leli liSodoma leGomora, kanti lemakhaya sekuthengiswa umzimba njengemadolobheni.”
Ayixabene.
