uMthunywa
Johas Moyo
INHLANGANISO yeLivestock Production Department esabelweni seMatabeleland South isicebise abalimi ukuthi baqaphele njalo bavikele izifuyo zabo kumkhuhlane we-lumpy skin kanye le-black leg nanko phela sokuke kwaba lembiko yenkomo esezihlatshwe ngumkhuhlane lo.
UMnumzana Aram Urayai onguLivestock Production Officer esabelweni lesi uthe abalimi kumele banakekele inkomo zabo ngoba zilakho ukubulawa yimikhuhlane le njengoba sekube lezifuyo ezimbalwa ezilawo kulandela ukuna kwezulu.
“Kulemikhuhlane evame ukuhlasela inkomo ikakhulu nxa izulu linile kungakho abalimi kumele babone ukuthi bayadoza inkomo zabo.
“Ukudoza kuyaphathisa njalo ukuthi inkomo ngaso lesi isikhathi utshani buluhlaza zingabi lenyongo,” kuchasisa uMnu Urayai.
Uqhubekele phambili njalo uMnu Urayai ekhuthaza abalimi ukuthi banakekele inkomo zabo ikakhulu eGwanda ngoba kubikwa sokuqhamuke umkhuhlane we-black leg kanye le-lumpy skin.
“Sikhuthaza abalimi ukuthi nxa bengabona izifuyo zilezibonakaliso zemikhuhlane baphangise babikele odokotela bezifuyo ukuthi bazelaphe njalo bahle baqalise ukuvikela ezinye izifuyo eziyabe zingakaqalisi ukugula kanti kuyimfanelo ukuthi kuhle kuvikelwe inkomo ezisesigabeni sonke leso nxa kuthe kwabonakala izibonakaliso zomkhuhlane ngoba uthelelwana ukuze isigaba sonke sibe lenkomo ezilempilakahle,” kutsho uMnu Urayai.
Uqhubekele phambili njalo uMnu Urayai ngokukhuthaza abalimi ukuthi babone ukuba inkomo zabo zihlala zivikelwe sonke isikhathi.
“Kuqakathekile ukuthi inkomo zihlale zivikelwe laloba nje zingakaqalisi ukugula lokho kuzasiza abalimi ukuthi bahlale lezifuyo ezizabapha inzuzo enengi njalo kungumlandu wabalimi ukuthi babone ukuthi izifuyo zabo zihlala zivikelekile.
“Kuqakathekile njalo ukuthi abalimi babe lolwazi ngemihlobo yemithi efunakalayo ezifuyweni zabo lapho abangakwaziyo khona babuze kubodokotela bezinyamazana ukuze bengahlabi izifuyo imithi engayisiyo,” kuphetha uMnu Urayai.
