uMthunywa
INKAMPANI yamagetsi iZimbabwe Electricity Supply Authority (Zesa) isehlise intengo yamagetsi ngesilinganiso esiphakathi kwe-11 kusiya ku-25 percent ngokwethula ibhendi ebiza imali ephansi ehlisa indleko nxa kuthengwa amagetsi ngenyanga njengendlela yokuphendula izikhalazo zikazulu zokuthi amagetsi ehliswe kancane.
Ngaphansi kwebhendi entsha le, amayunithi angu- 50 akuqala ngenyanga athengwa nge 52c ku-kwh elilodwa, angu- 51 kusiya ku 200 athengwa nge $1,14 ku kwh, kukanti amayunithi angu-201 kusiya ku 300 ehliswe aya ku-$3,12 kukhilowathi elilodwa. Intengo lezi ezintsha ziqala ngoLwesihlanu.
Kusitatimende, uphiko lweZesa, olwe Zimbabwe Electricity Transmission and Distribution Company (ZETDC) luthe ukwehliswa kwentengo yamagetsi kubhendi esuka ku 210kwh kusiya ku 300 kwh kwenziwe ngoba uzulu ekhalaze ngokubiza kwamagetsi nanko phela inengi labantu belisebenzisa amagetsi edlula i-200 yunitsi ngenyanga.
“IZimbabwe Electricity Transmission and Distribution Company (ZETDC) iyakujabulela ukumemezela ukwehliswa kwentengo yamagetsi ukuze abathengayo babelakho ukuthenga amagetsi ngemali ephansi.
“Kunyanga yinye ngayinye abathenga amagetsi baphiwa ithuba lokuthenga amayunitsi akuqala angu-50 ngentengo ye-52c okutsho ukuthi abayi $26 kugoqela lemithelo. I-150 kwh kunyanga efanayo ithengwa ngemali engange $1, 14 kuthi nxa sokufakwe umthelo abe yi$172.
Ibhendi entsha eye 100kwh esuka ku 210 isiya ku 300 kwh izathengwa nge $312 kugoqela imithelo. Amanye ama yunitsi athengwa ngemva kwe 300 kwh kunyanga yinye azathengwa nge-$ 4,88 ku-kwh elilodwa kugoqela imithelo,” kutsho linkampani.
I-ZETDC ichasise njalo ngokukhulunywa ngabantu ukuthi amagetsi atshiphile ungawathenga ngelanga lakuqala lenyanga. “Imicabango yabantu yokuthi amagetsi atshiphile ekuqaleni kwenyanga ayisi qiniso njalo lokhu bekubangela ukuthi abantu abanengi babuthane emawofisini eZesa besiyathenga amagetsi mhlaka 1 wenyanga yinye ngayinye. Ama-yunithi angu-300 alakho ukuthengwa yiloba ngaliphi ilanga lenyanga.”
