uMthunywa
YiNtatheli kaMthunywa
IQEMBU lesizwe kunguqu elamaWarriors ngoLwesihlanu lilubhekisa eSwaziland ukuyadibana leqembu lakulelo kumdlalo wokuzama ukungena kumqhugelwano weAfcon ka2017.
Zombili zizangqikilana ngoMvulo kuhlandla lesibili.
Umdlalo lo uza ngesikhathi abalandeli bomdlalo bevule amehlo ngamahemuhemu wokuthi umdlalo lo ubuzathengiswa ngabadlali abathile.
Okwamanje isizwe seSwaziland sesibike ukuba silungiselele saphelela ngakho asisoke sivumele ukuthi umdlalo lo uthengiswe. Umongameli wenhlanganiso yeZifa uPhilip Chiyangwa ngoLwesibili ubikele uMthunywa ukuba umdlalo lo bazawukhangela ngokuphelelisa bedinga amaqhinga okuvala ukuthi izikliwi ezathengisa imidlalo zingahlangani labadlali bamaWarriors ngitsho lasenkambeni.
Umdlalo lo ubalulekile kakhulu ngoba umqeqetshi wamaWarriors uCallisto Pasuwa uzadlalisa ithimu elabadlali abadla ubhedu kumaqembu abo phetsheya kwelizwe.
Kodwa ubudlwangudlwangu osebudalwe yimbiko yokuthengiswa komdlalo sekuphambanise amalungiselelo.
Ekhuluma loMthunywa ngoLwesithathu uPasuwa uthe kaboni lutho olungabehlula ngaphandle kokuthi abadlali bayekethise phakathi kwenkundla.
“Umsebenzi uhamba kakuhle enkambeni yethu. Abadlali engababizayo bakhona kodwa ngidaniswa yikuthi abadlali abatshibilikela eNgilandi uTendai Darikwa oweBurnley loBrendan Galloway (Everton) abasoke benelise ukuzodlala.
“Loba kunjalo ngilalo iqembu elibamba ziqine kuyo yonke indawo. Ngibathembile abafana laba. Ngiphinde ngagcizelela ukuthi kumele bakwazi ukuthi ukudlalela isizwe kuqakatheke kakhulu empilweni yabo njengabadlali.
Ukuwina imidlalo le kuzasikhuthaza ukuthi siqhubeke sisenza okuhle,” kutsho uPasuwa.
Omunye umdlali okuzwakale ukuthi kasoke enelise ukutshibilikela isizwe ngu Macauley Bonne oweColchester United.
Ngesifiso sikaPasuwa, amaWarriors bekumele aqale ukulolonga ngeviki edluleyo kodwa iZifa yehluleka ukuqoqa ngemfanelo. Ekulotshweni kwaloludaba, ihofisi yembiko eZifa ithe abadlali abaphetsheya balakho ukwehluleka ukuza ekhaya.
Okuhle yikuthi uPasuwa uqale ukulolonga labafana ababuyileyo ngoLwesithathu.
Nampa abadlali ababizwe nguPasuwa:
Onozinti: Washington Arubi (Pretoria University, SA), Tatenda Mukuruva (Dynamos), Donovan Bernard (How Mine).
Imvimbi: Partson Jaure (Pretoria University, SA), Eric Chipeta (Chippa United, SA), Costa Nhamoinesu (Sparta Praha, Czech Republic), Lawrence Mhlanga (Chicken Inn), Hardlife Zvirekwi (Caps United), Bruce Kangwa (Highlanders), Onismor Bhasera (Bidvest Wits, SA), (Everton, England), Elisha Muroiwa (Dynamos).
Abadlali abaphakathi: Willard Katsande (Kaizer Chiefs, SA), Marvelous Nakamba (Vitesse, Netherlands), Ronald Chitiyo (Harare City), Kudakwashe Mahachi (Golden Arrows, SA), Marshal Mudehwe (FC Platinum), Tafadzwa Kutinyu (Chicken Inn).
Abagadli: Knowledge Musona (KV Oostende, Belgium), Nyasha Mushekwi (Dalian Yifang, China), Cuthbert Malajila (Mamelodi Sundowns, SA), Khama Billiat (Mamelodi Sundowns, SA), Evans Rusike (Maritzburg, SA), Matthew Rusike (Helsingborg IF, Sweden).
