uMthunywa
Nkosilathi Sibanda
ABAHLALI besiqintini seNyamime, eNsiza sebehlanganise amakhanda babopha iqhinga lokwakha amakilasi lezindlu zababalisi esikolo seNyamime Primary.
INyamime ingaphansi kwenduna uSibasa.
Isikolo semfundo yaphansi lesi, silamakilasi ayisithupha lendlu eyodwa yababalisi kusukela ngo1991 okutsho ukuthi kusukela lapho akuzange kube lezakhiwo ezintsha. Kuminyaka edluleyo, uphahla lwamakilasi lwawa, amafasitela lezivalo sekwafa.
Abanye ababalisi basuka kulindawo bekhalaza ngokuthi izindlu azilungelanga ukuhlala umuntu. Abafundi kubikwa abasakhwabithi lokuya esikolo.
Ngokunanzelela ukuthi ikusasa labantwana lisengozini, abazali, abaphathi besikolo labosomabhizimisi bahlala phansi badinga amacebo okuqogelela imali ukuze umsebenzi wokulungisa isikolo uqalise.
Isikolo lesi silabantwana abangu-200 lababalisi ababili abavela kuHulumende labathathu abaqhatshwe ngabazali.
Iphephandaba likazulu livakatshele eNyamime Primary kwabonakala ukuthi umphakathi wakulindawo ulomthwalo.
Omunye wabaqoqi bomsebenzi wokulungisisa isikolo uMfundisi Khumbulani Mafu uthe isikolo sikusimo esibi ngakho bahlose ukuthi bancedise ekuthuthukiseni ukwakhiwa kwaso njengezakhamizi.
UMafu wafunda kulesi isikolo.
“Udaba lwesikolo sethu seNyamime Primary sidinga ukulungisiswa kakhulu. Sihlale phansi njengezakhamizi sabumba icebo lokuthi sivuselele isikolo sethu,” kutsho uMafu.
“Endaweni yokuthi isikolo sithuthukise impilo zabantwana, sekusiba nzima lokuthi ababalisi benze umsebenzi wabo.
Kwakulezindlu zababalisi ezintathu, khathesi sekusele ezimbili. Amakilasi awakhangeleki ngoba uphahla lungakhithika loba nini, iminyango lamafasitela sekudinga ukutshintshwa.
“Silusizi ngoba bekungathi labantu abafunda kulesi isikolo sebasikhalala. Kuhle-ke ukuthi khathesi sesibize wonke umntwana wakoGodlwayo ukuthi asukumele phezulu aphathise.”
UMafu uthe sebethole usizo kuzakhamizi labosomabhizimisi kodwa bazaqhubeka bedinga usizo bekhankasa lasebulenjini besebenzisa i#PushGodlwayo.
Osomabhizimisi abelula izandla kulumsebenzi babalisa uMnumzana Bhekimpilo Sithole oweMax Hardware, uDarlington Tlou, Obey Masilela, uRussel Dube odume ngelithi Babylon, uJotham Dube labanye abalokhe besiza.
“Ukubaqamba bonke abantu abaphathisa kulumsebenzi angeke kwanele ngoba imihla ngemihla bayeza ngoba umbiko wesimo sesikolo seNyamime ususabalele.
UMnumzana Bhekimilo Sithole uxhumane lentatheli yephephandaba likazulu wabika ukuba njengabosomabhizimisi bazakwenza konke okusemandleni abo ukuthi bavuselele isikolo.
“Isikolo seNyamime Primary ngesethu sonke abantwana bakoGodlwayo. Ukuwa kwaso kudinga usizo kithi sonke.
Njengosomabhizimisi angeke sihlale sigoqe izandla. Elami ibhizimusi leMax Hardware lizancedisa lisebenza ndawonye labanye osomabhizimisi,” nguSithole lo.
Kubikwa mhlaka 25 Nkwenkwezi kuzabuthanwa esikolo lesi kusethulwa impahla lolunye usizo.
“Mhlaka 25 Nkwenkwezi ngeAfrica Day siqoqe ukuthi sihlanganise abantu siyethule impahla ezasetshenziswa ekwakheni.
“Sizasungula ngokugcweleyo i#PushGodlwayo sikhuthaza abantu bakithi ukuthi bancedise kukho konke esifuna ukukwenza, kutsho uMfundisi Mafu.
“Sidinga ukwengeza impahla ebalisa isamende, amazenge i-window panes, ipenda, amabhuku aboGrade 7 e-new curriculum, impahla zemidlalo lokunye. Ngokuya kwesikhathi isikolo sizafuna ukufakelwa i-solar ukuze amagetsi atholakale.
