uMthunywa
Thokozile Mbedzi
ABADLALI benguqu abasakhulayo koBulawayo bazathi ukuphiwa ithuba elitsha lokuzitshengisela ngokuvuswa kweligi ehlose ukuthuthukisa ithalenta labo ePumula.
Uhlelo lolu luza njengemvuselelo ngenxa yokuthi beselutshabalele eminyakeni edluleyo ngenxa yesimo somnotho.
Kubikwa izakhamuzi zibone kufanele ukuthi zivuselele uhlelo lolu ngoba abasakhulayo bedinga ukuxhaswa ukuze bengangeni ezilingweni ezifana lokubhema izidakamizwa besebancane .
UKelvin Masilela oqondisa uhlelo lolu uveze ukuthi sebelungiselele ukuqala uhlelo lwabo ngesizini ezayo.
“Thina njengabazali sibone kufanele ukuthi sixhase abasakhulayo ukuze bathole okuzakwenza bangahlali bedala amacala lokuthatha izidakamizwa ngenxa yokuswela okokwenza.
“Sileqembu elibizwa ngokuthi Young Flying Stars elePumula Old le Young Stars elePumula North azedlala sijonge ukuthi abadlali labo bathuthuke babe ngabadlali abalodumo ngoba sikhuluma nje iqembu selithuthuke langena ku-Serie A selidlala lamaqembu amakhulu iHighlanders, iChicken Inn lamanye.
“Kungakho sitshayela ihlombe iqembu leYoung Flying Stars eselingenile lalo ku-Serie A. Isifiso sethu yikuthi abantwana laba baphumelele ngoba yona le inkundla abadlalela kuyo yikho okwadlala khona abafana asebelodumo abafana loSiza Khoza, Honour Gombani, uAgent Sawu labanye,” kutsho uMasilela.
“Njengezakhamuzi zePumula North sibone kufanele ukuthi sicele ubaba uSolomon Makhuya lobaba uMusharukwa ukuba basize ngokuqeqetshisa iqembu lethu ngoba bengabantu abalembali enkulu kweze nguqu.
USolomon Makhuya ubikele uMthunywa ukuthi usesebenze kakhulu kunguqu njalo uyenelisa ukuqeqetsha abafana.
“Sengihlale isikhathi eside kunguqu njalo ngilembali ngoba ngingomunye walabo abalesikhathi eside besebenza kweguqu koBulawayo. Ngaqeqetshisa iqembu le Eagles ngasebenza njalo leqembu leOld Nick Mine yaze yangena kuDivision One ngakho isicelo esilaso njengekhomithi sibambene loMasilela loNqobizitha Moyo omele iqembu leOld Pumula yikuthi uzulu aphathise ngazo zonke indlela ngama-kit, indleko zokuhambisa abadlali, ukudla lakho konke okudingakala ukuthi siqhubekele phambili,” kuphetha uMakhuya.