uMthunywa
Nkosilathi Sibanda
KUSASA lilanga elikhulu kumdlalo wenguqu. Kuvulwa incwadi ezethula umbiko wokuthi nguphi umdlali wenguqu kuzwa izwe lonke jikelele ngo2011.
Lisiyatshona abalandeli bazakwazi lokuthi abanye abadlali ababili abedlule abanye ngobani.
Incwadi elamabizo la kubikwa ivalwe ngci njalo izavulwa phambi kwenkundla ezakuthi gwaqa esigodlweni ntambama.
Ziyatshaya inhliziyo zabadlali abalitshumi lanye abangena kukhalenda yezingcitshi kuCastle PSL.
NgoMvulo waliviki intatheli zihlangene labaqeqetshi labokaputeni bamathimu zakhetha ingcitshi ezingu-11 zaphinda njalo lokukhetha inqwele yabo bonke.
Iqiniso yikuthi imvuzo yanamuhla ngeyabathathu ngakho phakathi kwetshumi lane akwaziwa ukuba inhlanhla iwele ngaphi.
Iqula labavotayo laqoqa ikhalenda eloHillary Bakacheza (Triangle), Elvis Chipezeze, Danny ‘‘Deco’’ Phiri, Clemence Matawu, Edmore Chirambadare (Chicken Inn), Stephen Makatula, (Caps United), Raphael Manuvire (ZPC Kariba), Tatenda Mukuruva, Ocean Mushure (Dynamos), Brian Muzondiwa (FC Platinum), Knox Mutizwa (Highlanders).
Inkundla yalamuhlanje izaphinda njalo ukubika umqeqetshi kuzwa kuleli.
Isizwe sizakuthi mehlo mpo kumqeqetshi weChicken Inn uJoey Antipas olethe inguquko enkulu kuqembu lakhe.
U-Antipas wenelisa ukuvusa iChicken Inn kuhlandla lakuqala wayilolonga yaze yaqeda iyintshantshu.
