uMthunywa
Cornelius Luphahla
KUBE yisisanasana umtshado wezinja ezitolo zeShaba eTsholotsho lapho ukhansila kaWadi 16 odinde khona umongi wekilinika kwaze kwahela kozeleyo kubangwa ukutshaywa kwenye intombi esebenzela ukhansila lo.
Insumansumane le yenzakale kuviki ephelileyo lapho uKhansila uPatrick Ngwenya adinde umongi uMbonisi Tshuma kabuhlungu kubangwa ukuthi uMbonisi utshaye uMelphiner Vundla ethi umalile, uMthunywa ukuzwile lokhu.
UMthunywa uxhumane lesinye isakhamuzi sakule indawo uMnumzana Ndabambi Khumalo ochaze ukuba uKhansila lo wenze into embi kakhulu.
“UKhansila uphambanisile kakhulu ngoba utshaye umongi engelacala okudale ukuthi umongi lo atshaye utshani, lakhathesi kakho kungakho-ke ikilinika ivaliwe ngoba nguye yedwa umongi obeyiphethe ikilinika le.
“Okusuka kucaphule yikuthi inengi labantu aliphilanga linatha ama ARVs sokuzabanzima ukuba liwathole okuyingozi ezimpilweni zabo njengoba umongi lo eseleviki wabalekela ukutshaywa ngukhansila,” kutsho uMnu Khumalo.
Ekhuluma loMthunywa ecingweni uKhansila uPatrick Ngwenya uvumile ukuba wamtshaya umongi lo.
“Mina ngamtshaya sibili uTshuma ngoba wayesenza ukuganga eqomisa abantwana abancane wabuya njalo watshaya unkazana ongisebenzelayo ethi umalelani. Noma nje ngamtshaya kodwa angizange ngamxotsha ekilinika ngoba angilawo amandla okumxotsha,” kutsho uMnu Ngwenya.
UMthunywa wenelise njalo ukukhulumisana loNkosazana Melphiner Vundla onguye owatshaywa ngumongi lo waveza ukuthi umongi lo wamtshayela ukuba wamala.
“Mina uTshuma wayehlala engikhombisa ngimala kwathi kwelinye ilanga wangibuza ukuthi ngiqinisile ukuthi ngimalile ngavuma wasesithi ngimbuluziswa lijaha engithandana lalo ngasengisithi engakhulumi ngejaha lami. Wasesithi ngimbuluza angathi ngihlala eLondon mina ngitshiswa lilanga njengaye khonapha.
“Kuthe kunjalo wathi ngingasekeli ijaha lami uzangitshaya ngempama kabuhlungu ngasuka ngaya esitolo engisebenza khona ngikhala. Ubaba uNgwenya wathi efika engibuza ukuthi ngikhalelani ngamtshela wasemlanda uTshuma wafika wamtshaya,” kuchaza uNkszn Vundla.
Imizamo yokukhulumisana loMnu Tshuma yehlule ngoba ucingo lwakhe belungangeni.
