uMthunywa
Christabel Matemera
UKWANDA kwezidakamizwa elokitshini lePumula North sekukhuthaze izakhamizi ukuthi zisukumele phezulu, nanko sekusungulwe iqembu lomdlalo wokuqaga, ngendlela yokuvikela intsha yakulindawo.
Izakhamizi lezi zibike ukuba zihlose ukuthi zisebenzise imidlalo ekulwisaneni lokusetshenziswa kwezidakamizwa, esezitshaphaze impilo yasabasakhulayo emalokitshini.
Selitshonela ukubhema imbanje, ukuhotsha i-cocaine, lokunatha utshwala
Ukuswelakala kosekelo, lokusilela kwenkundla zemidlalo, inengi lasabakhulayo selitshonela ukubhema imbanje, ukuhotsha i-cocaine, lokunatha utshwala. Lokhu sekuyinhlalayenza esikhathaze abazali ngoba bekubona ukuthi ikusasa yabantwababo isengozini.
Kubikwa ePumula lamantombazana asephatheka kulezi izidakamizwa.
Ngenxa yalokhu, izakhamizi zisungule iqembu leThandanani Netball Club sekunanzelelwe ukuba manengi amantombazane asekhwabitha izidakamizwa lokuya ebunandini abakubiza ngokuthi ngama- “Vuzu Party” ebusuku.
Izakhamizi zePumula North zikholelwa ukuba nxa kungavuselelwa amaqembu ezemidlalo, kungaba lula ukuthi balwisane lezidakamizwa.
UMthembo Mhlophe oyisikhulumi seThandanani Netball Club utshele iphephandaba likazulu ukuba umkhankaso wabo ngowokukhipha amantombazana esitaladeni.
Netball Club
“Inhloso yokusungula leliqembu yikuthi sifuna ukukhipha amantombazane ezitaladeni, sibavikele ekusebenziseni izidakamizwa,” kutsho uMhlophe.
“Sisebenzisa imidlalo ukuze sihuge abantwabethu enkundleni. Angeke sihlalele izandla sibakhangele betshaphaza ikusasa labo ngokunatha utshwala lokusebenzisa izidakamizwa.
“Ngomnyaka odluleyo sahlala phansi sabopha iqhinga lokuthi kusungulwe amaqembu emidlalo ethile.
Ngenxa yokuba abafana benelisa ukuthi badlale inguqu emaqenjini avele ekhona, kwaba licebo elihle ukuthi sibumbe iThandanani Netball Club sikhangele amantombazana ethu.”
UMhlophe ubike ukuba akusizi lutho ukuthi njengabazali baphikelele ngokugcona abantwana, endaweni yokuthi balungisise ilokitshi labo.
“Thina sakhula kudlalwa imidlalo yonke emalokitshini. Wawuzikhethela ukuthi ufuna ukwenzani. Izidakamizwa sasingazithinti futhi singazazi. Yikho-ke sihlose ukuphendukisa impilo efanayo ebantwaneni ngokwethula ezemidlalo lendawo lapho abangakwejisa khona.”
Abafana benelisa ukuthi badlale inguqu
Uthe iqembu leThandanani selike ladlala kumincintiswano etshiyeneyo egoqela imincintiswano ebiqoqwa yinhlanganiso yeBulawayo Progressive Residents Association.
“Abazali bengavaleli abantwana ezindlini. Nxa umntwana elethalenta kabuye ezozitshengisela. Asisekeleni abantwana abangamankazana.”
Iqembu leli lisungulwa ngesikhathi uHulumende ebike ukuba ukhathazekile ngenani lentsha ethatha izidakamizwa.
