uMthunywa
“ABANTU abaphume ezindabeni zami loThando, asimfuni umuntu wesithathu ozangena phakathi kwethu.”
La ngamazwi kamkhwenyana osemncane uSiyacela Dlamuka (16) obophe ifindo likasofa silahlane lesinqandamathe sakhe uThando Msomi (16) eMabedlane, eLundi indawo eseSouth Africa, ngoMgqibelo.
Ekhuluma lephephandaba leSolezwe ngeSonto ngaphambi komtshado izolo uSiyacela ofunda uGrade 9 eNdlovana High School khonangale eLundi uthe konke sekumi ngomumo ngomtshado.
“Ubona nje ngiqeda ukuyolanda izitulo lamakhekhe omtshado. Sizaqala ngomtshado wesiZulu khona la ekhaya. Umtshado omhlophe uzaba seholu ngo-4 ntambama,” kutsho uSiyacela.
Uthe akalalo loluncane uvalo lokungena emtshadweni esemncane ngoba uyindoda elesibindi, ekufezayo ekuqalileyo.
Isifiso sakhe uthe yikuthi umdeni kaThando uphatheke kahle emtshadweni wabo, kungabikhona into ezaphazamisa usuku lwabo.
Ugxeke kakhulu imibiko yokuthi umtshado wabo ucitshe wahlehla ngemva kokungagculiseki kukanina kaThando ngezinkomo okulotsholwe ngazo indodakazi yakhe.
“Ayikho leyonto yokuthi umtshado wethu ucitshe wamiswa. Abantu abayekele ukugxambukela ezindabeni zami loThando. Abayekele ukulokhu bethi sisebancane, thina siyayazi into esiyenzayo,” kuthetha uSiyacela.
Uyise kaSiyacela, uMbhishobhi Mthandeni Dlamuka (59) webandla leCorinthians Apostolic Church in Zion obezwakala ejabulile ukuqinisekisile ukuthi ziyawutshaya endodaneni yakhe.
Uthe baqambe betshilo labo abekade becabanga ukuthi lumtshado ngeke ubekhona.
Ufisele lezi zithandani ezisencane okuhle kodwa emtshadweni wazo.
UMpho Lengane ongumdidiyeli wohlelo lweMoja Love olukhuluma ngempilo yalezi zithandani, Isencane lengane uthe lumtshado uzovezwa amahola amabili kulolu hlelo emasontweni ambalwa azayo ngoNkwenkwezi 18, ngo-7:30 ebusuku.
Ukuqinisekisile ukuthi kube lezinkinga ezicitshe zaholela ekumisweni komtshado.
“UThando ofunda uGiredi 10 ubelovalo lokuthi uzokwazi yini ukuqhubeka ngesikolo uma esetshadile.
Ubekhathazwa layikuthi emva komtshado kumele ahlale izinyanga ezintathu emzini engabonwa ngabantu.
“Kuzamele ayekele isikolo sakhe eNkandla, usezoqhubeka afunde eLundi,” kutsho uMpho.
Esiqeshini sokucina sohlelo uMpho uthe uSiyacela uzovezela umdeni wakhe ishidi elimhlophe elizoqinisekisa ukuthi uThando umthole esayintombi nto.
— Ubulembu
