uMthunywa
Listen Ndlovu
KUTHOLAKALE isidumbu sowesilisa sinqunu emfuleni uChabasichana eDete.
Kubikwa mhlaka 16 Mabasa ekuseni ngehola lika 08:00 uTatenda Dlakama oleminyaka engu-13 wathunywa ngunina ukuyakukha amanzi emfuleni uChabasichana eCross Dete kodwa ngemva kwemizuzu waphenduka ethwele ibhakede elingela lutho wabikela uyise ukuba ubone isidumbu esingagqokanga duze lomfula.
Owabika icala watshela usobhuku uPaul Msimanga ngaphansi kwenduna uNelukoba lezinye izakhamizi mayelana lodaba lolo.
Wasuka lapho lezakhamizi basebesiya emfuleni kwathi ekufikeni kwabo bathola umufi elele ekhangele phansi.
Umzimba kwatholakala ukuba ngoka Alexious Nyathi.
Umfowabo uSylivia Nyathi onguye obike ukuba umfowabo wayesuke ekhaya mhlaka 15 Mabasa esiya ezitolo zeCross Dete kodwa kazange aphenduke ekhaya.
uInspector Glory Banda, Mat north
Isikhulumi samapholisa eMatabeleland North uInspector Glory Banda uthe lindaba ifikile kibo.
“Umbiko wahanjiswa enkambeni yamapholisa eHwange kwasokuhamba amapholisa eDete lama CID eHwange lapho okwakulesidumbu khona.
“Umufi utholakale enqunu ekhangele phansi esechibini legazi impahla zakhe ziseceleni kwekhanda.
Ubelenxeba elitshonayo phezulu kwendlebe okutshengisa ukuba uhlaselwe ngesikhali esibukhali.
Kutholakale imbodlela yotshwala eceleni kukamufi kodwa akutholakalanga sikhali,” kutsho uInsp Banda.
“Amapholisa acela umphakathi ukuba ubikele amapholisa aseduzane labo mayelana lalapho okungatholakala khona odale lelicala,” kutsho uInsp Banda egqiba inkulumo yakhe.
