uMthunywa
Ethel Ncube
ZIPHETHE izibindi ngezandla izakhamizi zeSilobela kulandela ukutholakala kwephetshana ebelilotshwe amagama ezakhamizi ezingu-30 kanye lokuthi kumele zihlupheke njani zize ziyekufa, uMthunywa ukuzwile lokhu.
UMthunywa uzwe ukuthi amabizo la abegejelwe esidulini afakwa phakathi kwesikafuthini andubana sivalwe ngodiwo.
Udaba lolu luvele ngoLwesibili edale lenduna uMalisa lapho esinye isakhamuzi esiveze ukuba sathi sigebha isiduli sathola udiwo lumbokothe isikafuthini esilamabizo abantu abangu-30 okwenza izakhamizi zabikela induna ukuba zicabangela ukuthi inyanga ehlala e-irrigation ingabe ilesandla kulokhu.
Intatheli ixhumane lenduna yakule indawo uMalisa eveze ukuba inyanga le ingabe ilesandla kusehlakalo lesi.
“Okwenza izakhamizi zicabangele ukuthi inyanga le yiyo eyagebhela amabizo abantu laba esidulini yikuthi kumaviki ambalwa edluleyo abantwana bayifica isesibholaneni bayibingelela yangaphenduli abantwana basebeyijikijela.
“Lokhu kuthe sekwenzakele yathukuthela yabagijimisa yasisiya kubazali babo isithi ifuna ukuhlawulwa ngenkomo bangekela izabathumela umbane. Lokhu kwenza izakhamizi zahle zahlalela evalweni ngoba abantwana kwakumele nje bakhuzwe hatshi ukuthi baze babhadaliswe,” kulandisa induna uMalisa.
Induna uMalisa iqhubekele phambili isithi emhlanganweni izakhamizi zikhulume ngazwi linye zathi kazisayifuni inyanga le esigabeni.
“Emhlanganweni izakhamizi zithe omunye wazo wathi egebha isiduli wahlangana lamabizo ezakhamizi kubhalwe ukuba zonke kumele zihlupheke.
“Inyanga le kucatshangelwa ukuba ingabe ilesandla emabizweni la ngakho izakhamizi zithe kazisayifuni lapha esigabeni ngoba isebenza ingelamvumo futhi esigabeni,” kuchaza induna.
Iqhubekele phambili isithi ithumele isithunywa sayo ukuthi siyecela amaphepha enyanga le aveza imvumo yokusebenza kodwa kawakafiki kuyo.
“Inyanga le kumele ithwale okwayo ibuyele kibo ngoba ekwenzayo yikuganga kuphela, mina ngifuna abantu bahlale kuhle ngokuthula hatshi ukuhlala besesaba ukuthi bazathunyelwa imibane lokugejelwa ezidulini,” kuphetha iNduna uMalisa.
