uMthunywa
YiNtatheli kaMthunywa
YISIPHITHIPHITHI emaphandleni eBeitbridge kulungiselewa iviki yezamasiko esiVenda eBeitbridge Cultural Village ezaqala ngoLwesihlanu.
Kubikwa amalungiselelo asesemaphethelweni njalo kukhangelelwe ukuthi umkhosi lo wenziwe esigabeni seMpande ngaphansi kwenduna uSitaudze ngenhloso yokuthuthukisa amasiko abantu bosendo lwesiVenda.
Intatheli kaMthunywa ikhulumisane loSikomitshi uNkosikazi Kiliboni Mbedzi yena oveze ukuthi sebelesikhathi belungiselela iviki yamasiko eVenda Cultural Village.
“Ngithanda ukubonga izakhamizi kanye leziphathamandla zonke ngoba umsebenzi lo ubumkhulu kodwa zonke ingatsha zibambisane umsebenzi wenziwa ngobunono obukhulu ngakho ususiya emaphethelweni.
“Sesisemaphethelweni okuqedisa amalungiselelo e-cultural week yethu kodwa ngemva kwalokhu sizaqala njalo amalungiselelo okuvula okusemthethweni iVenda Cultural village.
UNkkz Mbedzi uthe okwenza bakhetha ukwenza iVenda Culture Week yikuthi bafuna amasiko abo aqhubekele phambili.
“Sinanzelele ukuthi singekela ukuba leVenda Cultural Week amasiko ethu angatshabalala. Ngalokhu sibone kufanele njalo ukuthi umkhosi lo siwenzele eCultural Village yethu.
“Sithanda ukukhuthaza ikakhulu abasakhula ukuthi baphatheke kumkhosi ukuze bathole ulwazi ngezamasiko ethu,” kutsho uNkkz Mbedzi.
Uphethe ngokuthi umkhosi lo uzabuthanisa ingatsha ezinengi labantwana bezikolo ngakho uzulu wonke uyanxuswa ukuba afinyelele kulindawo.
