uMthunywa
Charity Moyo
SEZILAMULE zaze zaphosa izikhali phansi izakhamizi zeMberengwa ngaphansi kwenduna uChizungu kulandela ukungezwani okubekhona phakathi kwenye imuli kubangwa inkomo.
Isiga lesi senzakala ngoMvulo kuviki eliphelileyo.
Kuzwakale ukuthi uMnumzana Reason Tshuma (52), usedliswa imbuya ngoluthi ngabantwabakhe uNjabulo (23), lomnewabo uCharles bebanga inkomo ezahanjiswa kubotsikamutanda ngesikhathi beselaphisa unina wabo uSenzile Ncube (49).
Umfakazi obikele uMthunywa ngalindaba uMnumzana Khutshwa Moyo uveze ukuthi ingxabangxoza le yaqhamuka ngesikhathi abafana laba besiyakwelaphisa unina owayegula kubotsikamutanda. Uthe ngesikhathi besiyakwelaphisa unina kabazisanga uyise ngakho bakhetha ukungena esibayeni baqhuba inkomo ezine beqonde lazo lapho okwakuselatshwa khona unina.
“Udaba lolu soluhluphile kakhulu, imuli le isihlala ithwalelene amahloka kubangwa inkomo. UTshuma uthethe isithembo kungakho-ke umkakhe omncane onguye ozala abafana laba usegula umkhuhlane wengqondo.
“Abafana laba banakana ukuyakuzwa ukuthi unina ugula nje kubangelwa yini kubosiyazi lapho abafika batshelwa khona ukuthi ophosa unina ngumuntu osegumeni lakibo. Ngemva kwalokhu kukhanya batshelwa ukuthi bakhiphe inkomo bazilethe kubotsikamutanda laba lakanye bakwenza lokhu bengazisanga uyise okuyikho okwadala ingxabano le,” kutsho uMnu Moyo.
Kubikwa uTshuma wamangala esebona inkomo zakhe sezivalelwe komunye umuzi, lokhu kwabangela ukuthi ayebuza wasetshelwa ukuthi zazibhadele inyanga eyayiselapha umkakhe. Uthe nxa esiyabuza abantwana bamhlasela ngamahloka besithi yena kafuni kwelaphisa unina ngoba esazi ukuthi ngubani owamphosayo.
Omunye wabafakazi owayekhona ngesikhathi kusenzakala konke lokhu uNkosikazi Sharai Matutu uveze ukuthi kwabaluthuli koTshuma ngalelolanga ngoba abafana babevuke ubhova. Uthe uTshuma wazama ukubethusela kodwa akusizanga lutho ngoba wagijinyiswa ngamahloka kuthi umfazi omdala laye bamxotshanisa.
“Abantu bazama ukulamula kodwa kwakunzima ngalelolanga emzini kaTshuma. Abafana bathatha amahloka baxotshanisa phose umuntu wonke egumeni.
“Izakhamizi zacina zidela ngoba zibona ukuthi imizamo yazo yayingancedi njalo sezize zithenjiswa ukubulawa,” kulandisa uNkkz Matutu.
Intathelizindaba ixhumane loMnumzana Tshuma yena oveze ukuthi kuliqiniso lokhu. Uthe yena abantwana sebevuke obhova ngenxa katsikamutanda lo owabatshela ukuthi unina uloywa ngumfazi omdala ngakho bayancedisana.
“Angiselayo injabulo emzini wami, abantwabami bangithwalele ubhulo ngenxa yenkomo abazithatha bengangitshelanga besithi bazama ukwelaphisa umkami omncane. Utsikamutanda lo usebulele umuzi wami, abantwana sebesenza intando yabo njalo sebeqede inkomo zami.
“Sengibikele induna ngendaba le ngakho kumele indaba le ihlalelwe phansi ngeSonto kodwa abantwana bayala,” kuphetha uMnu Tshuma.
