uMthunywa
Thokozile Mbedzi
KUPHOSE kwafa abantu kwenye indlu yeMakokoba ngemva kokuba inkalakatha yesihlahla sohlobo lwejacaranda siwele phezu kwenye indlu eku Second Street kulelo lokitshi ngoLwesibili.
Isiga lesi senzakele ekuseni uNkosazana Patience Sibanda (23) umnikazi walindlu labanye abahlala kuleyondlu belele bavuswa yisihlahla sesiwele phakathi kwendlu kwaba yinhlanhla nje ukuba akula olimele kakhulu.
UMthunywa uxhumane loNkosazana Sibanda waveza ukuthi uloklhu etshaqekile ngokwenzakale endlini yakhe.
“Kangilankani ngesiga esingehleleyo ngilokhu nguimadolonzima ngicabanga nje ukuthi isihlahla lesi besingabulala umuntu. Sizwe ngomsindo omkhulu sokudilika uphahla lwendlu lempahla endlini zisifa sahle saphaphama.
“Silokhu sithithibele sonke lapha endlini ngoba lokhu kwenzakale sisalele sokusisa ngoLwesibili. Sibonga iNkosi ngoba sonke siphephile kulingozi bekulabantu abangu-15 abakade belele phakathi endlini ngesikhathi lokhu kusenzakala.
“Ngizwa ubuhlungu ngoba sesile sikhathi eside sibikela abeKhansili ngodaba lwesihlahla lesi ebesisikhulu njalo sesigugile kodwa bengathathi inyathelo lamhla sokuze kwaba lengozi ebingadlula lemphefumulo yabantu. Isikhathi esinengi basinika impendulo yokuba abala mitshina yokuzaquma ngazo,” kulandisa uNkszn Sibanda.
Omunye umakhelwane kaNkszn Sibanda othande ukwaziwa ngokuthi nguMankomo uveze ukuthi kudala ikhansili yayimane iphangise izelungisisa izikhalazo zabantu.
“Lokhu sokuyikuphila nzima kudala ikhansili yayinakekela abantu yayibhoda iquma izihlahla kodwa lokhu okwakathesi kuyasihlukuluza ngoba siphilela evalweni. Sicela ikhansili isinanze ngoba impilo zethu zisengozini.”
Esinye isakhamuzi esiziveze ngokuthi nguMnu Wiliam Makoni sithe izihlahla ezahlanyelwa yikhansili sezindala njalo yena wakhula zikhona khathesi useleminyaka engu (34). Uthe ezinengi sezibole impande kungakho zingawa yiloba siphi isikhathi.
“Sicela ikhansili iziqume izihlahla lezi ngoba thina singazi quma bayasibopha njalo khathesi isimanga ngesokuthi bathatha lenkuni kodwa izihlahla lezi yithi esiyabe sithanyela kusa kwamalanga njalo isihlahla sikithi bazisa ngaphi inkuni. Sicela izikhalazo zethu zikhangelwe emahofisini amakhulu ekhansili,” NguMnu Makoni lo. UKhansila weMakokoba uMnumzana James Sithole uthe umadolonzima ngesiga lesi kodwa ubonga ukuthi uNkulunkulu uphephise abantu kwangabi lokufa.
“Thina njenge khansili simadolonzima ngibonga inkosi ukuthi akubanga lokufa kwabantu. Isiga lesi ngigathi yingozi esehleleyo sokusinike ingqobe yokuthi sibone ukuthi sihlele njani ukuze ingozi ezinje zingezeki njalo . Ikhansili iyaphathisa ngezindleko zomonakalo nxa sokuphume impumela yomonakalo kwabeFirebrigade,” kuphetha uMnumzana Sithole .
