uMthunywa
Thokozile Mbedzi
ZIPHETHE izibindi ngezandla izakhamizi zeLusulu kulandela ukuqhamuka komkhuhlane we-anthrax kumaviki amabili edluleyo, uMthunywa ukuzwile lokhu.
Sokuvele ukuba kulabantu abathathu asebelatshwe esibhedlela seSt Luke’s eLupane kulandela ukutholakala belomkhuhlane we-anthrax lo.
UMthunywa uzwe ukuthi ngaphandle kwabantu sekulenkomo ezedlula amatshumi amabili esezifile ngenxa yesifo lesi.
UMthunywa ukhulumisane loMnumuzana Abel Sibanda oyisakhamuzi sakule indawo waveza ukuthi sebephelelwe yizifuyo ngomkhuhlane lo njalo bebengawunanzeleli.
“Umkhuhlane we-anthrax uqale ukuhlasela izifuyo zethu kumaviki amabili adluleyo. Ekuhlaseleni kwawo ubuhlasela inkomo ikakhulu. Bezivuka zifile singazi ukuthi zibulawa yini. Ngikhuluma nje sesiphelelwe yizifuyo asazi lokuthi sizalima ngani.
“Khathesi inkomo esezifile kusukisela kuviki ephelileyo sezisedlula amatshumi amabili,” kutsho uMnu Sibanda.
Esinye njalo isakhamuzi esikhulume loMthunywa uNkosazana Lindiwe Nkomo uthe umkhuhlane lo suhlasele lezakhamizi ikakhulu abantwana.
“Njengoba sasingazi imbangela yokufa kwezifuyo sasuka sadla inyama yakhona okudale ukuthi umkhuhlane lo uhlasele lathi. Ngikhuluma nje inengi labantu lisesibhedlela.
“Okubuhlungu yikuthi umkhuhlane lo uhlasele kakhulu abantwana abancane njalo kukhanya lokhe umemetheka ngamandla ngoba abantwana abanengi esigabeni balezilonda ngenxa yomkhuhlane lo,” kutsho uNkszn Nkomo.
UMthunywa uxhumane loDokotela wezifuyo esabelweni seMatabeleleland North uPollex Moyo uthe kuliqiniso ukuthi kuqhamuke umkhuhlane we-anthrax eLusulu njalo sebeqalisile ukuhlaba izifuyo ukuze benqabele ukumemetheka komkhuhlane lo.
“Kuliqiniso ukuthi ukuqhamuke umkhuhlane we-anthrax osuhlasele izifuyo kanye labantu eLusulu. Sesiqalisile ukuhlaba izifuyo sivikela kumkhuhlane lo. Okwakhathesi sesihlabe imihlambi eminengi kodwa eminye isasele sisalindele omunye umuthi kunkokheli zethu ukuthi siqhubekele phambili sivikela izifuyo kanye labantu,” kutsho uDkt Moyo.
UMthunywa uxhumane njalo loProvincial Medical Director esabelweni seMatabeland North uDokotela Nyasha Masuka oveze ukuthi sokulabantu abathathu abelatshwe esibhedlela seSt Lukes ngemva kokuhlatshwa ngumkhuhlane lo.
“Kuliqiniso ukuthi kuqhamuke umkhuhlane we-anthrax eLusulu osuhlasele abantu. Khathesi sazi ukuthi kulabantu abathathu asebelatshwe esibhedlela ngenxa yomkhuhlane lo kodwa kasilaqiniso lokuba yibo bodwa na.
“Okwakhathesi sithumele amaqembu abona ngezempilakahle ukuthi ayehlola umumo khonale ngoba kasikaze sibe labantu abahlaselwa ngumkhuhlane we-anthrax,” kuphetha uDkt Masuka.
