uMthunywa
uCornelius Luphahla
BEKUNGABIZWA ozwayo ngoLwesine ngeviki ephelileyo eLupane kumkhosi wokuqeqetsha intsha ebifundela imisebenzi yezandla esikolo seLupane Primary.
Abafundi laba abangu-75 abafundiswe yinhlanganiso yeYoung Africa bamukeliswe izithupha zokuqeqetsha kumisebenzi etshiyeneyo nguMphathintambo wogatsha lweYouth Indeginisation and Economic Empowerment, uKhomuredi Patrick Zhuwao.
UMqondisi walinhlanganiso uNkosazana Enet Mukurazita uchaze ukuthi inhlanganiso le isilesikhathi yasungulwa njalo ijonge ukuthuthukisa intsha yakuleli.
“Inhlanganiso yeYoung Africa yasungulwa ngo1998 eChitungwiza ngenhloso yokuthuthukisa intsha yakuleli ngokuyifundisa imisebenzi yezandla ukuze yenelise ukuzisebenza nxa ithe yaswela imisebenzi.
“Kule inhlanganiso sifundisa intsha eleminyaka esukela ku-15 kusiya kuminyaka engu-35 njalo sifuna ofunde wafika kuFomu 2 lanxa kwesinye isikhathi sithatha abacina kuGiredi 7 kodwa bona sibafundisa isikhathi eside kulabanye ukuze bazwisise kuhle,” kutsho uNkszn Mukurazita.
“Ekufundiseni lapha sithatha wonke umuntu ofunayo kumawadi wonke. Khathesi njengoba siqala ukufika eLupane sikhangelele ukuthi kusiya phela iminyaka emithathu sibe sesiqeqetshe intsha engaba ngange-1 330 khonapha eLupane.
“NjengoMqondisi wale inhlanganiso ngilokujabula okukhulu ngoba kukhanya izakhamizi zeLupane ziyamukela imfundiso elethwa yinhlanganiso yethu okutshengisa ukuthi iyathuthuka ngamandla,” kutsho uNkszn Mukurazita.
UNkszn Mukurazita uqhubekele phambili njalo wachaza ukuthi njengenhlanganiso kaHulumende bakhangelele ukwakha izikolo zemisebenzi yezandla ilizwe lonke jikelele.
“Sikhangelele ukwakha izikolo zemisebenzi yezandla ilizwe lonke jikelele ukuze senelise ukufundisa intsha endaweni ezehlukeneyo. Ngemva kweminyaka emithathu sifisa ukuthi sibe sesifundise intsha engaba yi-10 080,” kuveza uNkszn Mukurazita.
Ekhuluma kulo umkhosi uKhomuredi Zhuwao uchaze ukuthi intsha yonke ivunyelwe ukufunda.
“Yonke intsha elesifiso sokufunda ngaphansi kwale inhlanganiso ivunyelwe ngoba sijonge ukuthuthukisa imfundo kuleli. Ekufundeni lapha akuhlawulwa lutho kodwa kudingeka ingqondo kanye lesifiso sakho,” kuphetha uKhomuredi Zhuwao.
