uMthunywa
Cornelius Luphahla
ABALIMI bengulube sebekhuthazwe ukuba bahlabe ingulube zabo yinhlanganiso yeVeterinary Services ngenhloso yokuzivikela kumikhuhlane etshiyeneyo.
Isixwayiso lesi siza ngemva kokuba inhlanganiso le inanzelele ukuba inengi labalimi abafuya ingulube ikakhulu emakhaya kabavamanga ukuphatha kuhle ingulube zabo kanye lokuzihlaba amajekiseni okudala ukuthi zihlaselwe yimikhuhlane etshiyeneyo.
UMthunywa ukhulumisane lodokotela wezifuyo esabelweni seMatabeleland North, uDokotela Ndabezinhle Mkhwananzi uchaze ukuthi ingulube kufanele zihlale zivalelwe ngazo zonke izikhathi.
“Ingulube kufanele zihlale zivalelwe esibayeni zingavunyelwa ukuba ziphume phandle ukuze zingaze zadla ukudla okudala ukuba zihlaselwe yimikhuhlane okufana lobulongwe kumbe okunye ukudla njalo zingahlaselwa yimikhuhlane etholakala enyamazaneni zeganga efana le-foot and mouth,” kutsho uDkt Mkhwananzi.
UDoketela Mkhwanazi uqhubekele phambili njalo wachaza amajekiseni okufanele ahlatshwe ingulube kanye lemikhuhlane yakhona engazihlasela nxa zingasahlatshwanga.
“Ingulube kufanele iqale ukuhlatshwa ijekiseni isasengumdlwane olamalanga amathathu lapho ehlatshwa khona i-Iron/ Ferrous Injection ngenhloso yokuqinisa amathambo awo. Nxa umdlwane lo sulamalanga ayisithupha uyahlatshwa njalo ijekiseni ethiwa yi Vitamin E (Selenium) ubuye njalo uhlatshwe eyinye nxa suleviki ezimbili ethiwa yiVitamin A efaka uVitamin A emzimbeni wawo.
“Umdlwane lo nxa suleviki ezimbili uyahlatshwa njalo E.Coli vaccine eyokuvikela ukuqubuka engulubeni.
Njengoba nje imidlwane le iyaye ihlaselwe yikuqubuka esikhathini esinengi ngakho nxa sileviki ezintathu kusiya kwezine iyahlatshwa I-Erysipelas vaccine,” kutsho uDokotela Mkhwananzi.
Kubikwa ukuhlatshwa kwengulube lokhu kuyaqhubeka ngakho ingulube esezikhulakhulile okuthiwa ngama-weaners eziyabe zilamaviki aphakathi kwangu 8 kusiya ku-10 ziyahlatshwa njalo ngoba zandise ukuhlaselwa ngama-roundworms.
Okunye njalo ingulube kufanele zihlatshwe amajekiseni kabili ngomnyaka noma zingahlaselwanga ngumkhuhlane ngenhloso yokuzivikela emikhuhlaneni etshiyeneyo.
