uMthunywa
Gladmore Ncube
INHLANGANISO ekhangela ngezokulima lokufuya iVeterinary Services ikhuthaza abalimi abafuya ingulube ukuba baqakathekise ukuzihlaba amajekiseni kanye lokuziphatha kuhle ngenhloso yokuzivikela emikhuhlaneni etshiyeneyo.
Inkuthazo le yethulwe yinhlanganiso le ngemva kokunanzelela ukuba inengi labalimi abafuya ingulube ikakhulu emakhaya kabavamanga ukuphatha kuhle ingulube zabo kanye lokuzihlaba amajekiseni okudala ukuthi zihlaselwe yimikhuhlane etshiyeneyo.
UMthunywa ukhulumisane lodokotela wezifuyo esabelweni seMatabeleland North, uDokotela Ndabezinhle Mkhwananzi ochaze ukuthi ingulube kufanele zihlale zivalelwe.
“Ingulube kufanele zihlale zivalelwe esibayeni zingavunyelwa ukuba ziphume phandle ukuze zingaze zadla ukudla okufana lobulongwe ngoba kuyabangela ukuthi zihlaselwe yimikhuhlane.
“Okunye ukudla njalo ezikudla phandle kubangela ukuthi zihlaselwe yimikhuhlane etholakala enyamazaneni zeganga efana le-foot and mouth,” kutsho uDkt Mkhwananzi.
UDkt Mkhwananzi uqhubekele phambili njalo wachaza amajekiseni okufanele ahlatshwe ingulube kanye lemikhuhlane yakhona engazihlasela nxa zingasahlatshwanga.
“Ingulube kufanele iqale ukuhlatshwa ijekiseni isasengumdlwane olamalanga amathathu lapho ehlatshwa khona i-Iron/ Ferrous Injection ngenhloso yokuyiqinisa amathambo. Nxa umdlwane lo sulamalanga ayisithupha uyahlatshwa njalo ijekiseni ethiwa yi-Vitamin E (Selenium) ubuye njalo uhlatshwe eyinye nxa suleviki ezimbili ethiwa yi-Vitamin A efaka uVitamin A emzimbeni wawo.
“Umdlwane lo nxa suleviki ezimbili uyahlatshwa njalo i-E.COLI vaccine eyokuvikela ukuqubuka engulubeni. Njengoba nje imidlwane le iyaye ihlaselwe yikuqubuka esikhathini esinengi ngakho nxa sileviki ezintathu kusiya kwezine iyahlatshwa i-erysipelas vaccine,” kutsho uDkt Mkhwananzi.
Kubikwa ukuhlatshwa kwengulube lokhu kuyaqhubeka ngakho ingulube esezikhulakhulile okuthiwa ngama-weaners eziyabe zilamaviki aphakathi kwayisifica minwe mibili kusiya kutshumi ziyahlatshwa njalo ngoba zandise ukuhlaselwa ngama-roundworms.
UDkt Mkhwananzi uphethe ngokucebisa abalimi ukuthi ingulube kufanele zihlatshwe amajekiseni kabili ngomnyaka noma zingahlaselwanga ngumkhuhlane ngenhloso yokuzivikela emikhuhlaneni etshiyeneyo.
