uMthunywa
Silo Ophezulu Stinta kugwalo
SILOKHU siqhubeka lendaba kaDumazile owayesemithiswe ngumbalisi. Sinanzelela ukuthi uDumazile wayesezephelelwe yisimilo engasahloniphi ngitsho lababalisi abamfundisayo. Yena wayengananzeleli ukuthi umuntu ozidonsela amanzi ngomsele kwakunguye esebona ababalisi sengathi ngabantu abangacabangiyo yena sengcono okwamagama, kunzima nje lokuthi ananzelele ukuthi kalangitsho sona isithupha ngezemfundo angagwaba ngaso.
Lesi yisixwayiso esikhulu ebantwaneni besikolo ukuthi bananzelele indlela abahamba ngazo.Ababalisi besifazana babelakho ukumsiza umfundi aluba wazehlisa ngelengane ezimisele ukuxwayiswa kodwa ngendlela abeyisa ngayo kwenza labo bakhwezela isikhuni ngamandla UDumazile azithole esexotshwe esikolo.Ukuthandana kukaDumazile lombalisi kumhlubula ubuntu bakhe bonke, simbona seze engumqambi wamanga lalapho ahlala khona kunzima lokuthi uzabatshela daba bani, kwenza nje impilo yakhe yonke jikelele ibenzima ngento nje engelamsebenzi ayengaziphilela engelayo, ukuthandana lombalisi yena kukhangelelwe ukuthi athandane lengwalo zakhe zesikolo.
Kwakungela qhinga ayengalenza uDumazile, kwasekumele aqonde lapho azalwa khona. Wayezafika esithini pho kunina? Kwaqala ukuvuka imilayo yonke ayesuke eyilayiwe kodwa kwakungasasizi lutho. Ngakibo UDumazile wayesuke kunzima, abazali bakhe benze okokuthengisa inkomo yokucina ababelayo, lakho kuyisihelo sikanina elethemba lokuthi umntanakhe wayezafunda ukuze laye abelekusasa elihle abelakho ukubanceda njengabazali.Konke lokho wayesekuphahlazele phansi, wayezabakhangelelwa ngubani abazali bakhe.
Ngesikhathi uDumazile sekumele ayobhekana labazali bakhe umbalisi UMoloi wayengasekho lakuleso sikolo, wayezamdinga ngaphi lapho ayesazi khona? Wayesezipheke ngowakhe.
Ngalokhu ke abafundi bayaxwayiswa ukuthi kumele bananzelele ngobudlelwane babo laba balisi besilisa, bananzelele injongo emqoka ebahlanganisayo kuphela, okunye bazikhuphe kukho. Amazwi aluluju avela kwabesilisa abaphambi kwabo ayize neze, akukhathalekile ukunambitheka kwawo. Isihloko sendatshana sithi Isigcino ngesami.
Lokhu kuveza ukuthi sezisalele kuye umnikazi wendaba lapha okunguDumazile onguye osebhekene lomthwalo eyedwa umbalisi esedliwe ngamahlathi, kukho konke umuntu akwenzayo isicino sakho kukuye njalo, okuyikuthi umuntu kumele aqaphele izenzo zakhe.
