uMthunywa
Silo Ophezulu Stinta kugwalo
KUNDATSHANA elesihloko Emafezini Emlazi, sihlangana loDumazile ekhathazekile ngokucatshangelwa ukuthandana loSithole. Wayengaphathekanga ngokuzonda kukaMaNzimande ngento yonke nje wabona kufanele ukuthi aye kibo ayebikela abazali bakhe ngomumo ayephakathi kwawo. Isehlakalo lesi simkhumbuza xathu laleso ahlangana laso ngesikhathi esesikolweni lapho acina khona esemithiswe ngumbalisi.
Engumuntu ohlakaniphileyo uDumazile ngabe uyaziqathanisa izehlakalo lezi ananzelele lokuthi esakuqala wasiphatha njani, njalo samnika mpumela bani.
UDumazile uthola insukwana zokuvakatshela kibo lapha afika alandisele unina ngohlupho aphakathi kwalo. Lapha sibona inkolelo isibusa njalo phakathi kwalaba bobabili, uMaNdovela ukuthatha ngelithi emsebenzini lapha kufanele umuntu aziqinise ngokuthile ukuze angadelelwa lula nje ngabantu bonke lokuthi nje agcine umsebenzi ungamlahlekeli. Kulelo uDumazile wavumela phezulu ngoba engafisi ukulahlekelwa ngumsebenzi loba nje ekuqaleni wayengazwisisi indaba yemithi.
Silandela amandla enkolo kanye lobubi benkolo sinanzelela ukuthi uMaNdlovela usuka abe lobulembu emehlweni akhe. Kasimboni ecubungula isehlakalo kumbe lokho akutshelwa yindodakazi yakhe njengomuntu omdala, lokuthi ayeluleke indodakazi yakhe ngezinto ezidala inzondo efana lale ahlangana layo emsebenzini wakhe, lokuthi angakwenqabela njani lokho.
Ngemva kwensuku uDumazile esadla izihlahla wabuyela emsebenzini wakhe koSithole. USithole wajabula kakhulu ukumbona esephendukile loba nje kuMaNzimande kwakuyibuhlungu benhliziyo ngoba wayengafisi ukuthi uDumazile lo abuye abeseduze lomyeni wakhe. Ngakolunye uhlangothi uLizzy onguye owayethwala izindaba ngokufisa kwakhe ezisa kumkaSithole, wagula kwaba kubi.
Labo-ke ngenkolo bamgijimisela enyangeni efika ihlahlule ngokubona kwayo. Kubuhlungu-ke ukuthi ukuhlahlula kwayo kakumsebenzeli uLizzy kodwa inyanga le ijinge ithi yona abalandelanga izeluleko njengokweluleka kwayo.
Sinanzelela ukuthi indikimba yenkolo imqoka kakhulu, kuzehlakalo ezibalulekileyo ezempilo.
Ekuphendukeni kwakhe uDumazile ubuhle basebungathi buphindiwe. Izinsizwa zasezingena ubuthumuthumu esitolo sikaSithole loba nje ekuqaleni wayejabula ukuthi imali iyangena wasuke wakhulelwa yinzondo edibane lobukhwele sengathi uDumazile lo wayeyinkosikazi yakhe. Sekhulelwa yimizwa uSithole wayesezama ngazo zonke indlela ukuthi etshone evalele uDumazile lo esitolo angabonwa muntu. Wayesadinga amazwi angazibika ngayo, nango nje “hayi suka akudedwe mani uphondo luvele lugcwele amanzi.”
