uMthunywa
Silo Ophezulu Stinta kugwalo
SIQHUBEKA ngendaba kaDumazile lapho sebehambe esikolo babuya sebebambe owangaphansi umbalisi sedliwe ngumswenya. Abadala bathi imihlolo iyahlolelana betsho beqinisile.UMandovela ngemini efanayo wayesebuyele esikolo ngethemba lokuthi wayezathola uMoloi esephendukile kodwa lutho.
Engakaze nje afike ndawo wahlangabezwa ngabantwana bakoMpaza lapho ayetshiye khona uDumazile wahle wayifunda ivaliwe uMandovela lapho esizwa elithi kabuye ngokuphazima kwelihlo.
Zasezifikile izinsuku zikaDumazile, kwase kunzima lapha ekhaya amakhosikazi ayesephume ngobunengi bawo bezimisele ukuzonceda kodwa kwacaca nje ukuthi umsebenzi lo ababebhekane lawo wawu ngangabo, wawusufuna abanikazi abawufundeleyo.Kwaqhatshwa imota yokumgijimisela esibhedlela lapho uMandovela alala ewavulile khona. Kwaze kwathi nje sekusile kwathutsha umongikazi onguye owamazisa ukuthi uDumazile wayesekhululekile loba nje wayehlinziwe njengoba wayesesemeni esibi.
Lapha sikhangela izinga likaDumazile, khona ukuthi wayesesengumntwana wesikolo, wayengakafiki kuzinga eliqotho lokuba ngumama okungayikho njalo okwadala kwakhokhela ekuthini aze ahlinzwe. Ngobunye ubunzima abatsha abazithola bephakathi kwabo lobu konke kusukela nje ekujaheni umdaka lo. Kuqakathekile njalo ukuhlalisana kuhle esigabeni kuthi lalapho omunye ehlelwe yibunzima kube ngumthwalo wabantu bonke, KoMpanza babengasoze benelise ukubhekana lohlupho luka Dumazile bebodwa, kuyisifundo esikhulu ukuthi abantu kumele bafunde ukuhlalisana kanye lokuncedisana kuthi lalowo ololutho oluthile asize ngakho abanye nje ngomnikazi wemota owenelisa laye ukusiza engelakukhononda.
Ngemva kokubeletha kwasekumele babuyele ekhaya uMandovela lendodakazi yakhe uDumazile. Ekusukeni kwabo babengatshiyanga kukuhle emuva pho babezangena bekhangele ngaphi emzini kaKheswa sebebathathu lokwenza.Akukho okwakungenziwa wazinika isibindi wakubona kulicebo elihle kakhulu ukuthi bafikele komakhelwane uMaJwara.
Kwakuqakathekile ukuthi aqale alungiselele ukuhlangana lomkakhe yikho kwakufanele ukuthi akethole amaqhinga kanye lezixwayiso kwabanye izikhathi ezinengi umuntu olohlupho uba lobunzima bokuphuma lamacebo lapho sekumele acabange njalo kuyinto enhle ukudinga usizo umuntu angaze athi yena uyazibonela kumbe uzazicabangela amasongo akhala emabili. Phezu kwesisanasana ayekuso uMandovela lapho uMaJwara semchazela ngamanga abafika bawapheka kuKheswa.
