uMthunywa
BAKHONA abafundisi asebesenza iziga emabandleni abo ngokwenza izigigaba ezithile ezimangaza abantu. Abanye ngabenza abazalwane badle utshani, inyoka kuthi abanye labo babanathise iphethulo kwelinye icele abanye bebafafaza ngemithi yokubulala izibungwana.
Khathesi sokuvele omunye umfundisi okubikwa wenza izimvu zakhe zinathe “utshwala ‘obungcwele’.’’
Kodwa-ke utshwala lobu ayisibo bokuzithokozisa hatshi, abebandla leli bathi ngobensindiso.
Imifanekiso yabantu benatha utshalwa lobu isabalaliswe kunkundla zokuxhumana okutshiye abantu bebambe owangaphansi. Abanye bebekubona kuhlekisa nje kodwa abanye kubacasulile ukuthi abantu bangaqilwa ngendlela ephansi kangaka ngumfundisi obaqambela amanga okumgceke.
Umfanekiso obukwe linengi labantu ngowomfundisi lo enathisa omunye umzalwane utshwala lobu njalo lumfanakiso ubukwe njalo wathandwa ngabantu abedlula 8 000.
Iphephandaba leDaily Sun likhulume labamabandla atshiyeneyo ukuze lizwe imibono yabo ngalesi sehlakalao.
UArchbishop Johannes Leshaba webandla le Saviour Department Apostolic Church of South Africa uthe iBhayibhili liyakutsho nje ukuthi ekucineni kuzakuba labafundisi bamanga.
“Abafundisi laba ngabenza izimanga besebenzisa amanye amandla ngaphandle kukaMoya Oncgwele,” kutsho uLeshaba.
“Njengamakholwa kumele siqathanise lokhu okukhulunywa liBhayibhili lalokhu okwenzakalayo kulezinsuku.”
Umfundisi Vusi Mashabane webandla leChurch On The Hill uthe abantu kumele bafunde njalo bazwisise izwi likaNkulunkulu.
“Lokhu kuzenza abantu bangathathwa lula ngabantu abangamaqili,” kutsho uMashabane.
Abantu bakhulume okunengi kunkunlda zokuxhumana.
Brilliant Malomane: “Umhlaba usuyotshabalala.”
Mamosa Jele: “Ibandla leli kumele livulwe kithi, lingathola amalunga amanengi.”
Tawonga Williams: “Lobu yibuthakathi! Amalunga ebandla leli ayizithutha zokucina njalo awalaleli izwi likaNkulunkulu.”
Sandiswa Mlomzale: “Kumele silivakatshele ibandla leli bangane!”
Cici Simasiku: “ Lokhu asikwenzi kubandla lethu kodwa ngingathanda ukuvakatshela leli bandla. — Ubulembu
