uMthunywa
Buhlebenkosi Gaule
ABOGATSHA lwePublic Service Labour and Social Welfare bemanyene labezemfundo yaphansi laphezulu baphakathi kwamalungiselelo omcimbi we-Career Fair ezabuthanisa abafundi bezikolo ezitshiyeneyo eNkayi ngenhloso yokubaphathisa ukuthi benelise ukukhetha abafisa ukukwenza bangaqeda izifundo zabo.
Umcimbi lo uzakwenziwa mhlaka 3 Nhlangula esikolo seNkayi High School.
Inhloso ye-career fair yikwabela abafundi ulwazi ngemisebenzi etshiyeneyo abangayenza nxa sebeqeqetshile ezifundweni zabo.
Kumcimbi lo kunxuswe amaYuvesithi, amakolitshi kanye lamankampani atshiyeneyo akuleli ukuba azochasisela abafundi ngezifundo ezitshiyeneyo. Lokhu kwenzelwa ukuba abafundi babelolwazi nxa sebekhetha amakhosi emisebenzi abafisa ukuyenza.
Ekhuluma emele ugatsha lwezisebenzi uMnumzana Wellington Mkhwananzi uchaze ukuba ngalolusuku kukhangelelwe ukuba amayunivesithi lamakolitshi achasise njalo aveze okufunakalayo ukuze abafundi benelise ukuqhubeka ngezifundo abazabe bezikhethile.
“Kumankampani atshiyeneyo azaba ekhona kukhangelelwe ukuba labo batshele abafundi ukuba nxa bezaqhatsha abantu ukuba bayenze imisebenzi etshiyeneyo bona bazabe befuna abantu abayabe befunde aphi amakhosi.
Ekhuluma emele inhlanganiso ezimeleyo iWorld Vision, uNkosazana Yakhani Moyo ongu-Finance Manager uthe inhlanganiso yabo ibone kulicebo elihle kakhulu ukuthi baphatheke kuloluhlelo ngoba njengenhlanganiso bafisa ukuthi abantwana bakulesisigaba bathole ulwazi olujulileyo ngalokhu abangakwenza empilweni.
“Thina sincedisana labogatsha lwezemfundo lolwezisebenzi sifisa ukuba uhlelo lolu luncede abantwana abazabakhona ku-Career Fair le,” kuphetha Nkszn Moyo.
