uMthunywa
Nkosilathi Sibanda
INTSHANTSHU zokugijima imango emide edolobheni lakoBulawayo zilakho ukuthola usekelo ngokuqhutshwa kwemincintiswano kunyanga kaMpalakazi, kubika inhlanganiso yeBulawayo Athletics Board.
Inhlanganiso le ithe ihlele ukuthi kube lemijaho emibili ezanxusa intshantshu zokugijima ezihlezi koBulawayo lalezo eziphuma kwamanye amadolobho.
UManuel Mpofu umgcinisihlalo womdlalo wokugijima koNtuthu ubikele iphephandaba likazulu ukuba baphezulu kokukhulumisana lamankampani athile angasekela ukuqhutshwa kwemincintiswano yabo yokuphetha umnyaka.
“Kuzamele siqhube imijaho yokuvala umnyaka ukuze abagijimi bethu bathole usekelo. Inhloso ihlala ingeyokuthuthukisa umdlalo wethu, sinike labasakhulayo ithuba lokuthi bazibonakalise emphakathini, “ kutsho uMpofu.
Ukuqhutshwa kwemijaho emide koBulawayo kulumnyaka kuphanjaniswe yikuswelakala kwemali kodwa labo abagijimayo bathole ithuba kumjaho wePPC Zimbabwe Matopos 33miler.
UMpofu uthe kungumbono wakhe ukuthi idolobho lenze imijaho eminengi okuyikho okuzavuselela lumdlalo, kuphakamise lesisindo sedolobho kubavakatshi.
Kusenjalo, kulequla labagijimayo bakuleli abasanda kuvela eLondon kumjaho omkhulu walonyaka owe-World Athletics Championships.
Iqembu leZimbabwe belilamalunga amahlanu uMilton Matende olodumo lokwenza kuhle kumincintiswano eqhutshwa kuleli, uRutendo Nyahora ogijima eseSouth Africa loConstance Chidziva.
Abanye bekunguTatenda Shumba loTinashe Muyanga abaseMelika, okubikwa sebetshaye intambo ngezikhathi ezibavumela ukuthi babeyingxenye yeqembu lesizwe.
Inengi labagijimayo abavela koBulawayo liyehluleka ukuphatheka emincintiswaneni ephezulu ngenxa yokuthi abenzi kuhle.
Uluhlu lwemincintiswano olukhitshwe yi National Athletics Association of Zimbabwe (Naaz) luveza ukuthi ngomnyaka ozayo kuzagijinywa umnyaka uze uyephela.
Iphephandaba likazulu lixhumane loTendai Tagara umkhokheli weNaaz uTendai Tagara obonge bonke abaphatheka kumdlalo wokugijima lonyaka.
“Kuyajabulisa ukuthola ukuthi banengi abantu bakithi abaphatheka kumdlalo wokugijima. Sikhuthaza abasakhulayo ukuthi baze ngobunengi babo, ikakhulu labo abalethalenta lokugijima.
“Lonyaka iZimbabwe incintise yonke indawo ikakhulu kumincintiswano ehlelwe yinhlanganiso yeInternational Athletics Associations Federation. Okwakhathesi sikhuthaza abagijimi bethu ukuthi baqalise ukulungiselela imijaho ka-2018,” kutsho uTagara.
Inhlanganiso yeNaaz icele usizo kumankampani amakhulu ukuthi asekele amaqembu abasakhulayo.
