uMthunywa
Cornelius Luphahla
AMAQEMBU kanobhutshuzwayo esigabeni seNkayi seqalile ukulungiselela imidlalo yokucina ezavula amasango okungena kuligi yoMphakathi ezaqala ekuqaleni komnyaka ozayo.
Iligi le isungulwe yinhlanganiso ethiwa nguMphakathi Resource Center edabuka eNkayi njalo amaqembu azangena kuligi le azahlungulwa ngama-tournaments azabakhona kule indawo.
UMthunywa uxhumane loMhleli wezemidlalo kule inhlanganiso uThembani Khumalo wathi inhloso yokwenza ama-tournaments la yikuthi bathuthukise intsha kwezenguqu babuye bakhethe amaqembu azaphatheka kuligi.
“Okwenza sibe lama-tournament enguqu yikuthi sifuna ukukhetha amaqembu azangena kuligi yoMphakathi ezaqala kumnyaka ozayo. I-tournament yakuqala izakuba khona mhlaka 7 Mpalakazi eMathetshaneni esikolo lapho okuzabe kulamaqembu alitshumi.
“Emaqenjini la sizathatha amane kusukela kuntshantshu yakhona kusiya kwelesine. Enye njalo i-tournament izakuba khona eZenka mhlaka 23 Mpalakazi kuthi eyokucina ibe seGwamayaya mhlaka 1 Zibandlela 2017. Kuyo yonke imikhosi le sizabe sithatha amaqembu amane kuphela,” kutsho uThembani Khumalo.
Ekhuluma lentatheli uEddmore Moyo ongomunye wenkokheli zalinhlanganiso uthe amaqembu azanqoba kumidlalo le azathola imivuzo njalo bazengezelela amaqembu la azangena kuligi.
“Amaqembu azanqoba kuma tournaments la azaphiwa imivuzo yama-kit kanye lamabhola. Okunye njalo amaqembu la azangena kuligi njengoba azabe engu-12 sizangenisa amanye amaqembu esaqala lawo kudala amane. Kuligi yethu sizakuba lamaqembu angu-16 azaphuma phakathi kwamaqembu la azaphatheka emidlalweni le.
Sikhangelele ukuthi sinxuse abaqeqetshi bamaqembu amakhulu enguqu ngesikhathi iligi yethu isizaphela ukuze azokhetha abadlali abangenelisa ukubadlalela kumaqembu abo.
“Okwakhathesi sisakhathazwa yimali yokuthuthukisa imidlalo yethu, isifiso sethu yikuthi ngabe siyathola abantu abangasincedisa ukuze sithuthukise intsha kwezenguqu,” kuphetha uEddmore Moyo.
