uMthunywa
YiNtatheli kaMthunywa
INHLANGANISO yeZimbabwe Olympic Committee ibika ukuthi amalungiselelo okuyancintisa kumidlalo yamaOlympics aqhuba kuhle, kutsho uAdmire Masenda umaqhuzu walinhlanganiso.
Imidlalo yamaOlympics izaqhutshelwa edolobheni leRio de Janero, eBrazil ngoNcwabakazi. AmaOlympics alonyaka azahlabusa kubathandi bezimidlalo kuleli ngoba kuncintisa lethimu yesizwe amaMighty Warriors.
AmaMighty Warriors aqalise ukudlala okobungane leBanyana Banyana eyeSouth Africa ngempelaviki lapho anqotshwe khona 1-0.
UMasenda ubike ukuba inhlanganiso yabo ayisoze iqine ngokukhangela imncintiswano yalonyaka kuphela kodwa iphezulu kokubumba abadlali abazanctisa kumaOlympics azayo.
“Njengoba imidlalo yamaOlympics, akumelanga sikhohlwe ukwakha amaqembu akusasa. Abadlali esibathembe khathesi bazaguga betshiyane lokuncintisa. Asifuni ukuthi sehluleke ukuhlanganisa amathimu amaOlympics ilizwe ligcwele labadlali.
“Amalungiselelo ethu aqhuba kakuhle. Sikhangelele ukuthi kusiyafika uNcwabakazi sesiqede konke okumele kulungiswe anduba siyedinga imendulo eBrazil,” kutsho uMasenda.
Kusenjalo, iZOC isibumbe uhlelo olubizwa ngokuthi yi-Grassroots Development oluhlose ukulolonga abasakhulayo okukhangelelwe ukuthi bakhethwe kumathimu azamela isizwe kumidlalo etshiyeneyo.
“IZOC izimisele ekuthini abadlali abalethalenta, sifuna ukuphakamisa abadlali abasacathula.Abadlali laba bazakhethwa kuzo zonke izabelo. Kuyinhloso yethu ukuthuthukisa abadlali abancinyane ngoba yibo abacina sebemela iZimbabwe kumncintiswano yaphezulu.”
Nyakenye iZOC yenze isivumelwano lamankampani amanengi azimisele ukuphathisa kwezemidlalo.
Inkampani yeDairiboard yabangeyokuqala ngokuphosela i$30 575 kumncintiswano wokugijima kubadlali abaleminyaka yokuzalwa eqalisela ku 13 kusiya ku15.
Inkampani le yavumelana leZOC ukuthi izahlawulela umncintiswano we “13-15 Fun ‘n’ Fresh Athletics Explosion” okweminyaka emithathu elandelayo.