uMthunywa
Nkosilathi Sibanda
AMAQEMBU e-chess koBulawayo aseqalisile ukubhalisa kulungiselelwa ukuqala kweligi le kulimpelaviki.
Isikhulumi senhlanganiso yeBulawayo Chess Association (BCA), uRussell Dzute ubike ukuthi amaqembu abalisela iNational University of Science and Technology (Nust), Khami Prison, ZRP Drill Hall, ZRP Fairbridge, Hillside Teachers College, School of Mines, Bulawayo Chess Club, Midlands State University kanye lamanye asebhalisile ukuthi aphatheke kuligi yalonyaka.
“Iligi iyaqala ngoMgqibelo njalo kumpelaviki edluleyo besiphathekile ngokunikeza amaqembu ehlukeneyo amaphepha okuthi abhalise.
“Amaqembu amanengi azile sibili ngobunengi bawo njalo sikhangelele ukuthi kuzabe kutshitsha unwabu kulisizini,” kutsho uDzute.
Ubike njalo ukuthi iligi le izagoqela kanye lezikolo zeHigh School ngenhloso yokuthuthukisa abadlali ukuze labo bayencintisa kumidlalo emikhulu phetsheya kwamazwe.
“Sikhangelele ukuthi izikolo zakoBulawayo lazo ziphatheke kulumdlalo ngakho kuzabe kulomncintiswano omkhulu kulisizini,” kutsho uDzuta.
Omama labo bazatholiswa amathuba okudlala i-chess kulisizini njalo amaqembu abalisela iNust, Hillside Teachers College, MSU, BCC, ZRP Drill Hall kanye le School of Mines baveze ukuthi kulamaqembu abomama azaphatheka kulumdlalo.
Ingcitshi ye-chess koBulawayo, uRonald Chimanzi kubikwa enikeze isipho senkezo ezizanikezwa labo abanqobileyo emdlalweni lo.
