uMthunywa
Cornelius Luphahla
IZAKHAMIZI zelokitshini leNew Magwegwe koBulawayo zikhathazekile ngokuphenduka kwezenzo zentsha ikakhulu amantombazana asesikolo asethengisa imizimba yawo kwenye ibhawa ekulelilokitshi.
Kubikwa ngoLwesithathu maviki onke ebhawa le (ibizo siligodlile) kuxokozela intsha esesikolo kumkhosi weLadies’ Night.
Ukukokotsha kwabantwana kule ibhawa kukhanya sokulesikhathi eside kwaqala kumcimbi lo waphakathi kweviki lapho amantombazana lamajaha aphithizela kule indawo kuze kuse.
Ekhuluma loMthunywa uMnumzana James Nkomo oyisakhamuzi kulelilokitshi njalo onatha kule ibhawa uchaze ukuthi ukuziphatha kwentsha le kumcimbi weLadies’ Night kuyethusa.
“Abantwana besikolo laba babakhona kakhulu ngoLwesithathu maviki wonke lapho okuba lomkhosi wamantombazana othiwa yiLadies’ Night. Lapho-ke kuyabe kugcwele kunyikinyeka umhlaba abantwana laba abancane bethengisa imizimba abanye benatha baze bazikhohlwe.
“Noma nje abanye babantwana laba bengabakuleli lokitshi abanye bakhona bavela kwamanye amalokitshi bezodinga imali ngokuzithengisa.
“Isimanga yikuthi abantwana laba bancane kakhulu okokuthi abanye babo bafanele ukuba ngoFomu 2,” kutsho uMnu Nkomo.
Omunye wamajaha anatha kule ibhawa oziveze ngokuthi nguShakes uveze ukuthi lokhu kwenzakala nxa kuthe kwaba leLadies’ Night kumbe iGents’ Night.
“Nxa kule-Ladies’ Night kumbe iGents’ Night abantu bonke ngaphandle kwabantu abadala kakhulu bayabe begcwele ebhawa le.
“Abantwana laba bayabe benatha utshwala abanye bethengisa imizimba,” kutsho uShakes.
Esinye njalo isakhamuzi sakule indawo uNkosazana Siphathisiwe Nkala uveze ukuthi uzwa ubuhlungu ngomninibhawa lo ovumela abantwana besikolo begida ebhawa yakhe engabaxotshi.
“Mina ngizwa ubuhlungu kakhulu ngomninibhawa lo ovumela abantwana bezogida ebhawa yakhe kulokuthi babe befunda ingwalo zesikolo.
“Ngesifiso sami ngabe iyavalwa ibhawa le ngoba abantwana laba abagida lapha bazacina behlatshwa yimikhuhlane bebancane,” kutsho uNkszn Nkala.
Esinye isisebenzi esithengisa ebhawa le esiziveze ngokuthi nguSis P sibuzwa ngale indaba sithe ngeke sikhulume lutho njalo ngeke sinike muntu inombolo zikamakhalekhukhwini kamninibhawa le esisebenza kiyo.
“Mina ngeke ngilitshele lutho ngale indaba ngoba amabhawa mabili lapha kungani lingabuzi kule enye. Ngeke ngikuphe inombolo zikamakhalekhukhwini zomqhatshi wami ngoba kasifuni kuphuma kuphephandaba,” kutsho uSis P.
Imizamo yokukhulumisana loMninibhawa le yehlule.
