uMthunywa
Singena kusahluko sesithathu. Lapha sithola uKhotso eselele obukaBhuka eziphuphela mnandi. Ubuthongo bamthatha bamusa ngezikhathi lapho unina esaphila esidla izibiliboco esaqolotsha okwethole konke kumnandi, wayeziphumulele umntaka Bubbles.
Ngasekamelweni likaNgwenyama uMaMsie wayesewise imbodlela ezintathu zotshwala. Wehluleka nje khona ukukhulula impahla yemali ayeyigqokile. Wavela waziphosa phezu kombheda wajumeka kuqala kulo Ngomyama.
Ngengqondo yakhe egcwele inkoliso obakhe ubuthongo bahle bamusa ebunandini lapho azithola edansa loJoza wakhe kamnandi kunjeya. UNgonyama yena wayelokhu egiqigiqika ubuthongo busala ukwehla. Wayewavule wonke engawayi zolo kwaze kwathi lapho sekuvimbanisile endlini wabona sekufanele avule amafasitela ukuze kungene umoya. Konke lokhu yizenzo eziyangisayo emuntwini wesifazana loba nje yena wayengakuboni konke lokhu.
Wake wathi ukujumeka okwemizuzwana uNgonyama. Waphaphama njalo esevuswa yizo insizi lenhlupho zomhlaba.
Waphaphamela embuzweni eyelawo ngoBubbles. Wayezibuza ukuthi ngempela wayeqondeni, wayevele engaphi esenzani? Zazingekho impendulo kukho konke lokho.
Umqondo wakhe njalo uyamzulisa umxhumanisa lokwazana kwakhe loBubbles. Babe bonke eMatopo ababili laba bengamathe lolimi. UBubbles lo wayevele engumngane womuntu wonke. UBubbles lo wayethandeka kakhulu ezintombini kanye lasemajaheni. Wayeyisiphoxo okokuthi lapho ayekhona abantu babesifa ngembambo engumuntu owayeyisiphoxo okwamagama. Kusenjalo-ke lobuhlongandlebe labo babukhona bumi impondo kuBubbles lapha.
Esikolo lakhona-ke wayengasweleki phakathi kwabajeziswayo imihla yonke. Abadala bathi ikhula lamanono ayo, loba nje isikolo seMatopo sazama ukumakha kodwa konke lokhu kwakuyikuthela amanzi emhlane wedada.
Ukukhula kwakhe lakho kuvele kudalela ubuhlungu mhlawumbe kulapho okwavela kwaphambana khona amankomitsho. Ekukhuleni kwakhe uBubbles wavele wakhula umuzi wangakibo usudungekile wachitheka unina wakhetha ukuzula lelizwe, ekuduheni kwakhe lapha wahamba lalo oyintombazana watshiya uBubbles. Uyise laye wayeyindlamanzi.
Wayevuka ngovivi esiya emsebenzini izingane zisalele. Ekutshayiseni lapha wayezidlulela etshwaleni anathe akholise labangane aze alibale, ekufikeni kwakhe njalo izingane ziyabe sezilele. Lokhu kucaca ukuthi uKhoza wayengazazi izingane zakhe loba zazilele ngendlala kumbe zazigula. Wayengakhathali. Emva kokuduha kukanina kaBubbles uyise kaphindanga wathola elinye ikhosikazi lokwakha lalo umuzi ngokucacileyo.
UBubbles wazithola esekhuliswe ngonina abanengi sibili. Okusobala ukuthi abanye babengalandanga ukuzogcina ingane kodwa babezokudla isamba sikaKhoza.
