uMthunywa
Buhlebenkosi Gaule
INHLANGANISO yeAgritex isiveze ukuthi iphakathi kohlelo lokuhlola izilimo kanye lezifuyo elizweni lonke jikelele ukuze kwazakale ukuthi bathole isivuno esinganani kanye lokuthi izifuyo zabo zikhangeleka njani lonyaka.
UMnumzana Dumisani Nyoni onguProvicial Agricultural Extension Officer esabelweni seMatabeleland North uchaze ukuba lokhu kungokwesibili ukuhlola izilimo kanye lezifuyo ngoba bake benza uhlelo olufanayo ngenyanga kaNhlolanja.
“Sesiqalisile ukungena kumawadi sibona ukuthi abalimi bavune okunganani ngenhloso yokuthi sibone ukuthi isilinganiso sesivuno ebesikhangelelwe sisenelisile na.
“Uhlelo lolu luzaqhubeka kuze kufike umhlaka 17 Mabasa lapho uMphathintambo wezokulima azakutsho khona amabizo abalimi abazabe bephumelele ukuphuma lesivuno esiphezulu njalo belezifuyo ezibukekayo,” kutsho uMn Nyoni.
UMnu Nyoni uqhubeke esithi inhlanganiso yeAgritex luyazi ukuba akutholakalanga izulu elinengi lonyaka njalo liphuzile ngoba ezinye izilimo besezitshile kodwa lokhu akutsho akuba abalimi abakho abangatholanga izivuno esiphezulu.
Ukuhlolwa kwezilimo lezifuyo akumiswa yikuguquka komumo womkhathi ngoba ngaso sonke isikhathi kumele kwaziwe isivuno esiyabe sitholakele.
“Ngesikhathi sokuhlolwa kwezifuyo lezilimo abalimi baba lethuba lokuthi batsho inhlupho abahlangane lazo ngesikhathi sokulima njalo bathole izixwayiso ezivela kunhlanganiso ye Agritex,” kutsho uMnu Nyoni.
Ungezelele njalo wathi ngaphandle kokuhlola izilimo lezifuyo inhlanganiso yeAgritex izakhangela njalo ukuthi kulamanzi okunika izifuyo kanye lawabantu okunatha.
Uphethe ngokuthi abalimi bazaziswa ngesimo sesivuno sendaweni sakibo kanye lezifuyo ngemva kwelanga lokuthakazelela uzibuse.
