uMthunywa
Arnold Ndlovu loGladmore Ncube
KULANDELA indaba yomfundi owazibulala ngokuzibophela ngoMvulo weviki eledluleyo endaweni yeMbuyazwe izakhamuzi zakuleyo ndawo zithethe isinqumo sokuvimba imimoya emibi ngokuhlanza indawo le.
UMthunywa ufike kuleyondawo lapho izakhamuzi lezi ebezitshise isihlahla okuyikho lapho umuyi uBrandon Moyo obengumfundi azibophela khona. Ngokwenza lokhu izakhamizi zithi zixotsha imimoya emibi engabe isihlasele isigaba sabo.
Ngokuzwa kukaMthunywa umuyi uBrandon Moyo obengumfundi eMbuyazwe Secondary School wazibophela ngemva kokuxabana kwakhe lonina ngeSonto ebusuku, kodwa imbangela yokuxabana kwabo ayisatholakalanga.
Umuyi Moyo wazibulala ngokuzibophela esihlahleni seminyela esikhangelane lesikolo abefunda kiso eseMbuyazwe.
UMthunywa ukhulumisane loMnumzana Eveton Gonamombe oyisakhumuzi kuleyondawo othe beyisigaba sonke bahlala phansi labakhulu besigaba kwavunyelwana ukuthi isihlahla lesi singaletha imimoya emibi ngakho kufanele siganyulwe.
“Ngemva kwendaba kamfana lo okhethe ukuzibulala ngokuzibophela, njengesigaba sikhethe ukuthi isihlala lesi esikhangelane lesikolo sisitshise njalo sisigebhele phansi ngoba singaphambanisa isigaba kanye labantwana besikolo.
“Okunye njalo okubangele ukuthi isihlahla lesi sitshiswe yikuthi siseceleni kwendlela okuhamba khona abantu. Okuzwisa ubuhlungu yikuthi uyise kamuyi usebenzisa indlela leyo malanga onke esiya emsebenzini ngakho sikubone kuqakathekile ukuthi sisikhiphe ukuze singamphambanisi,” kutsho uMnu Gonamombe.
Intatheli iphinde yakhulumisana losobhuku wakulesi isigaba owaziwa ngokuthi NguNgoma othe ukutshiswa lokugebhela isihlahla lesi phansi kuyindlela yamasiko yokuxotsha imimoya emibi.
“Isihlahla lesi sisitshise sasigebhela kulandela ukuzibophela komunye umfundi esigabeni. Le yindlela yamasiko yokuxotshwa kwemimoya emibi engabe isihlasele isigaba sethu.
“Ngesiko lethu, nxa singakwenzanga lokhu imimoya emibi singaqhubeka ibhodabhoda esigabeni sethu okungabangela ukuthi abantu baqhubeke bezicitsha umphefumulo ngokuzibophela,” kuchaza uSobhuku uNgoma.
Okhangela ngezemfundo koBulawayo uProvincial Education Director (P E D) uNkosazana Olicah Kaira ofike esikolo lesi ngemva kokutholakala kwesidumbu sikamuyi ukhuthaze abazali ukuthi bakhulumisane labantwana nxa kulokuxabana okukhona.
“Ngemva kokubhubha komntwana lo ngendlela eyisihluku njengezemfundo silahlekelwe, okunye njalo ngikhuthaza abazali ukuthi nxa belokungazwani labantwana babo bahlale phansi bekhulumisane labo kumbe babikele ababalisi ngoba bona baqeqetshwa kuGuidance and Counselling,” kuphetha uNkszn Kaira.
