uMthunywa
Johas Moyo
INTSHA yeSikhoveni, eSigodini isisungule inhlelo ezitshiyeneyo ezizakubalakho ukuyithuthukisa iphinde ilethe ingqubekelaphambili esigabeni.
Inhlelo lezi zilakho ukuphathisa intsha ukuthi ithole okokuziphilisa nanko phela imisebenzi kayitholakali elizweni.
Iphephandaba likaZulu lixoxe lo Thuba Msimanga onguProject Manager wohlelo lwabatsha waveza ukuthi babumba iqembu labatsha abangu-8 abaqala ukubhaka amabhanzi besebenzisa amalahle.
“Sakubona kuqakathekile ukuthi siqale iphurojekithi ezasinika okokuziphilisa. Iqembu lethu lihlangene abesilisa labesifazane okokuthi abanye balayo impahla asebayithengayo ngenxa yomsebenzi lo esiwenzayo.
“Sipheka amabhanzi ngamalahle besesiwathengisa ukuze sithole imali njalo lokhu sokuphumelele okokuthi silakho ukuziphilisa lezimuli zethu. Abanye bethu sebakha izindlu ngemali abayithola lapha kuthi abanye labo sebasungula amanye amabhizimusi okutshengisela ukuthi siqhuba kuhle,” kutsho uMnu Msimanga.
Uqhubekele phambili wathi okwenza baphumelele njengeqembu yikuthi basebenza ngokubambana.
“Okwenza siphumelele yikuthi iqembu lethu libambene njalo sesenelisa ukufinyelela ezinye inhlanganiso sathola usizo lokufundiswa ngezamabhizimusi.
“Sesike sayakwenza ikhosi yeBusiness Entrepreneurship lenhlanganiso yeEmpretec kabili endaweni ezehlukeneyo.
Lokhu kusenza sithole amathuba amanengi okuthi sifunde ngempilo njengentsha,” kutsho uMnu Msimanga.
Uqhubekele phambili waveza indlela abapheka ngayo amabhanzi ngomlilo okuyinto engajwayelanga kumaprojekithi atholakala emaphandleni.
“Sivuba ifulawa sihlanganise lesikhukhumezi (yeast), sifake itshukela elilingeneyo letshwayi sisebenzisa amafutha okupheka kumbe umajarina njalo amabhanzi ethu ngawohlonzi oluphezulu yikho abantu bewathanda.
“Ukuwapheka kuthatha imizuzu engamatshumi amathathu sibala isikhathi esisithathayo ukufaka inhlama ukuthi ikhukhumale kanye lokuthi sipheke evuthwe. Phezu kwama oveni ethu kuyabe kulomlilo omncinyane ikanti ngaphansi kuyabe kulamalahle amalutshwana enza kuvuthwe kuhle kungatshanga.
“Sandise ukupheka amabhanzi angu 700 ngelanga njalo nxa siwathengisa elilodwa libiza i5 cents. Abantu baza ngobunengi babo ukuzowawoda,”, kutsho uMnu Msimanga.
Kubikwa njalo ukuthi iqembu leli selake latshaya izitina njengenye yamaphurojekithi alo njalo abanye sebakhe izakhiwo ezinhle okugoqela ispecial bar ezavulwa maduze nje.
Ngokutsho kwamalunga eqembu leli kubikwa ukuthi iqembu leli liyasilela ngezinye izinto zokusebenzisa ekuphekeni njalo licela ukuphathiswa ikakhulu zinhlanganiso ezizimele zodwa.
