uMthunywa
YiNtatheli kaMthunywa
ABASEKELI bomdlalo wenguqu yamantombazana kuleli sebekhuthazwe ukuthi banike iqembu lesizwe amaMighty Warriors idlabuzane mhla lidlala kumqhudelwano weCosafa ozaqhutshwa koBulawayo kusukela mhlaka 13 kusiya ku24 ngoMpandula.
Inkuthazo le ivela kunhlanganiso ephethe umdlalo wenguqu yamantombazana eyeZimbabwe Women’s Football.
Abalandeli labathandi bomdlalo bazakholisa ukubukela imidlalo yeCosafa enkundleni zeBarbourfields laseLuveve.
AmaMighty Warriors okwamanje asenkambeni yokulolonga ngaphansi komqeqetshi uSithethelelwe ‘‘Kwinji 15” Sibanda edolobheni leHarare.
Amantombazana esizwe akuqula elilamazwe abalisa iZambia, Madagascar leMalawi. Kumdlalo wakuqala azadibana lesizwe seMadagascar eBarbourfields, kulandele oweZambia leMalawi.
Umsekeli wenhlanganiso yeZWF uSamukeliso Silengane uthe kudingeka ukuba abasekeli benguqu bonke elizweni bagcwalise inkundla zeBF laseLuveve ukuze iqembu lidlale lilokuzethemba.
“Ayikho eyinye indlela esingakhuthaza ngayo iqembu lamaMighty Warriors ngaphandle kokuthi sigcwalise inkundla kumncintiswano weCosafa.”
Uqhubeke wathi umqhudelwano weCosafa uzaphakamisa isisindo somdlalo wamantombazana akuleli unikeze abadlali bakuleli ithuba lokubonakala emphakathini.
“Ithalenta esilalo lizabonakala. Abadlali balakho ukuhawukelwa ngamanye amaqembu eAfrica laphetsheya,” kutsho uSilengane.
Inkokheli zenguqu yabomama kumhlubulo ongezansi yelizwe seziveze ukuba ziphakathi kokukhulumisana labosomabhizimusi abalakho ukusebenzelana labo ngokuphathisa ukuthi imidlalo le iqhutshwe kuhle.
